ភ្នំពេញ ៖ នៅក្នុងអំឡុងខែនីមួយៗ នាយកដ្ឋានការពារហេដ្ឋារចនាសម្ព័ន្ធ តែងតែរៀបចំកិច្ចប្រជុំផ្ទៃក្នុងរបស់ខ្លួនយ៉ាងទៀងទាត់ ជាក់ស្តែងកាលពីព្រឹកថ្ងៃទី ២៦ ខែ កញ្ញា ឆ្នាំ ២០១៤ វេលាម៉ោង ០៩:០០នាទី នាយកដ្ឋាន បានបើកកិច្ចប្រជុំផ្ទៃក្នុងមួយ ក្រោមអធិបតីភាព លោក ស សេរីវិចិត្រ ប្រធាននាយកដ្ឋាន លោក គឹម ម៉ាក្សសី អនុប្រធាននាយកដ្ឋាន និងមានការអញ្ជើញចូលរួមពីអស់លោក លោកស្រី ជាប្រធាន អនុប្រធាន ការិយាល័យ មន្រ្តី បុគ្គលិក ទាំងអស់ផងដែរ ។
ជាកិច្ចចាប់ផ្តើម លោកប្រធាននាយកដ្ឋាន បានមានមតិស្វាគមន៍ សាកសួរសុខទុក្ខដល់មន្រ្តី ក្រោមឱវាទទាំងអស់ ក្នុងឱកាសនៃការឈប់សំរាកចូលរួមពិធីបុណ្យភ្ជុំបិណ្ឌប្រពៃណីជាតិខ្មែរ ដែលទើបតែកន្លងផុតទៅថ្មីៗនេះ ដោយបានធ្វើដំណើរទៅកាន់ស្រុកកំណើត និងទទួលបានសេចក្តីសុខ សុវត្ថិភាព ទាំងពេលធ្វើដំណើរទៅ និងវិលត្រលប់មកវិញ ដោយមិនមានបញ្ហាកើតឡើងឡើយ ។ នៅក្នុងកិច្ចប្រជុំប្រចាំខែកញ្ញានេះ អង្គប្រជុំបានពិភាក្សាដោយផ្តោតសំខាន់ទៅលើផែនការសកម្មភាពការងាររយៈពេល១ឆ្នាំ (២០១៥-២០១៦) របស់នាយកដ្ឋានការពារហេដ្ឋារចនាសម្ព័ន្ធ ដែលជាត្រីវិស័យក្នុងការជំរុញដំណើរការនៃការអនុវត្តការងារឲ្យស្របតាមតួនាទី និងភារកិច្ច ក្នុងការប្រឆាំងនឹងអំពើភេរវកម្ម ដែលអាចកើតឡើងជាយថាហេតុ ព្រមទាំងចាត់វិធានការដោះស្រាយរាល់ផលវិបាកដែលកើតពីឥទ្ធិពលនៃភេរវកម្មនោះផងដែរ ។
ជាលទ្ធផល ស្មារតីនៃអង្គប្រជុំ បានសម្រេចលើការរៀបចំផែនការសកម្មភាពការងាររយៈពេល ១ឆ្នាំ (២០១៥-២០១៦) ប្រកបដោយជោគជ័យ និងប្រសិទ្ធិភាព ៕
