ភ្នំពេញ ៖ ឆ្លងកាត់ការបណ្តុះបណ្តាលអស់រយៈពេលជិតពីរខែ ស្តីពីសៀវភៅផែនការជាតិប្រឆាំងភេរវកម្ម ដែលបានរៀបចំឡើងនៅលេខាធិការដ្ឋាន គ.ជ.ប.ភ ស្ថិតក្នុងមូលដ្ឋានកងទ័ពការពារអាកាសពោធ៍ចិនតុង ចាប់តាំងពីថ្ងៃទី ១៨ ខែ សីហា ឆ្នាំ ២០១៤ កន្លងមកបានឈានដល់វគ្គពិសេស គឺការណែនាំពីការសរសេររបាយ៍ការណ៍ស្ថានភាព SITREPs (Situation Reports) ។
ជាក់ស្តែង នៅព្រឹកថ្ងៃទី ០១ ខែ កញ្ញា ឆ្នាំ ២០១៤ វគ្គបណ្តុះបណ្តាលដែលមានការបង្ហាត់បង្ហាញផ្ទាល់ពីឯកឧត្តមឧត្តមសេនីយ៍ឯក គឹម នាន និងមានការអញ្ជើញចូលរួមពីលោកប្រធាន/អនុប្រធាននាយកដ្ឋាន ប្រធាន/អនុប្រធានការិយាល័យ និងមន្រ្តី បុគ្គលិក នៃលេខាធិការដ្ឋាន គ.ជ.ប.ភ ជាសិក្ខាកាមជាច្រើននាក់ផងដែរ ។
ការយល់ដឹងពីការសរសេររបាយការណ៍ស្ថានភាព (SITREPs) ពិតជាមានសារៈសំខាន់ណាស់ ដែលបែងចែកជាដំណាក់កាលសំខាន់ៗដូចជា របាយការណ៍មុនពេលកើតហេតុ ក្នុងពេលកើតហេតុ និងក្រោយពេលកើតហេតុ បូករួមទាំងការគ្រប់គ្រងព័ត៌មាន និងចែករំលែកព័ត៌មានផងដែរ ។ ក្រៅពីការសិក្សាទ្រឹស្តីនៅមានការលើកជាឧទាហរណ៍ និងការអនុវត្តជាក់ស្តែងដើម្បីឲ្យសិក្ខាកាមរៀនសរសេរដោយផ្ទាល់បានយល់កាន់តែច្បាស់ និងប្រាកដថាក្រោយបញ្ចប់វគ្គបណ្តុះបណ្តាល គឺអាចយកចំណេះដឹងទាំងអស់នេះទៅប្រើប្រាស់បានគ្រប់ៗគ្នា ។ ជាមួយគ្នានេះដែរ ក៍មានលំហាត់អនុវត្តស្តីពីការប្រឆាំងភេរវកម្មមួយចំនួន ដោយលើកយកបញ្ហាដែលពិភពលោកកំពុងតែមានការព្រួយបារម្មណ៍យ៉ាងខ្លាំង និងកំពុងតែរួមគ្នាចាត់វិធានការនានាប្រយុទ្ធប្រឆាំងនោះ គឺក្រុមភេរវកម្មឥស្លាមនិយមជ្រុល ISIS ដើម្បីឲ្យសិក្ខាកាមបានផ្តល់មតិយោបល់ពិភាក្សាគ្នារកដំណោះស្រាយ និងយន្តការមួយចំនួនក្នុងការសរសេរបង្ការទប់ស្កាត់កុំឲ្យកើតមានក្នុងព្រះរាជាណាចក្រកម្ពុជា ដោយដាក់ចេញជាសេនារីយោផ្សេងៗ និងបានបែងចែកជាក្រុមពិភាក្សាតាមនាយកដ្ឋាននីមួយៗទៅតាមតួនាទី ភារកិច្ចនិងសកម្មភាពដែលកើតឡើងជាក់ស្តែងក្នុងពេលកើតហេតុផងដែរ ៕
