ភ្នំពេញ៖ ព្រឹកថ្ងៃទី២២ ខែមករា ឆ្នាំ២០១៥ វេលាម៉ោង ០៩:០០ នាទី នាយកដ្ឋានការពារហេដ្ឋារចនាសម្ព័ន្ធ នៃលេខាធិការដ្ឋានគណៈកម្មាធិការជាតិប្រឆាំងភេរវកម្ម បានរៀបចំកិច្ចប្រជុំផ្ទៃក្នុង ប្រចាំខែមករា ឆ្នាំ២០១៥ ដោយមានការ អញ្ជើញចូលរួមជាអធិបតីពីសំណាក់ ឯកឧត្តម ឧត្តមសេនីយ៍ឯក គឹម នាន សមាជិកលេខាធិការដ្ឋានគណៈកម្មាធិការជាតិប្រឆាំងភេរវកម្ម លោក សរ សេរីវិចិត្រ ប្រធាននាយកដ្ឋានការពារហេដ្ឋារចនាសម្ព័ន្ធ, លោកអនុប្រធាននាយកដ្ឋាន និងមានការអញ្ជើញចូលរួមពីអស់លោកប្រធាន/អនុប្រធានការិយាល័យ, មន្រ្តី បុគ្គលិក ទាំងអស់ជាច្រើនរូបផងដែរ ។
ថ្លែងបើកកិច្ចប្រជុំនេះ លោកប្រធាននាយកដ្ឋាន បានមានមតិស្វាគមន៍ និងថ្លែងអំណរគុណដល់ ឯកឧត្តមឧត្តមសេនីយ៍ឯក គឹម នាន ដែលបានអញ្ជើញចូលរួមក្នុងកិច្ចប្រជុំនេះ និងបានសាកសួរសុខទុក្ខដល់មន្រ្តី បុគ្គលិកក្រោម ឱវាទទាំងអស់ដែលបានបំពេញកិច្ចការងារដ៍ល្អប្រសើរសម្រាប់ឆ្នាំកន្លងមក និងសើ្នឲ្យមានការលើកជាមតិយោបល់ ស្តីពីបញ្ហាប្រឈមនានា សម្រាប់ដាក់ទិសដៅក្នុងឆ្នាំ២០១៥នេះបន្ថែមទៀត ។ បន្ទាប់ពីទទួលការអនុញ្ញាតពីលោកប្រធាននាយកដ្ឋានរួចមក, លោក យឹម សុខឡេង ប្រធានការិយាល័យការពារហេដ្ឋារចនាសម្ព័ន្ធទី១ បានធ្វើសេចក្តីរាយការណ៍ពាក់ព័ន្ធនឹងការងារស្រាវជ្រាវអំពីភេរវករ ឬប្រវត្តិនៃក្រុមភេរវកម្មផ្សេងៗ ដើម្បីរៀបចំធ្វើបទបង្ហាញនោះ គឺការិយាល័យរបស់លោក បានសិក្សាអំពីប្រវត្តិរបស់ក្រុម IKS , ការិយាល័យការពារហេដ្ឋារចនាសម្ព័ន្ធទី២ បានធ្វើការសិក្សាពីប្រវត្តិរបស់ក្រុម ISIS , ការិយាល័យទី៣ ពុំកំណត់ប្រធានបទសម្រាប់ការស្រាវជ្រាវទេ ហើយការិយាល័យសមយុទ្ធ បានសិក្សាទៅលើក្រុមឥស្លាម ដែលរស់នៅភាគខាងត្បូងនៃប្រទេសហ្វីលីពីន ត្រង់ចំណុចប្រជុំកោះមិនដាណាវ និងត្រៀមសម្រាប់ការធ្វើបទបង្ហាញនៅ សប្តាហ៍ក្រោយ។
ក្នុងឱកាសនោះដែរ ឯកឧត្តម ឧត្តមសេនីយ៍ឯក គឹម នាន បានលើកជាយោបល់ជូនដល់លោកប្រធាននាយកដ្ឋានថាៈ កិច្ចប្រជុំថ្ងៃនេះ គឺផ្តោតសំខាន់ទៅលើការអនុវត្តន៍ផែនការ សកម្មភាពសម្រាប់ឆ្នាំ២០១៥ អោយកាន់តែទទួលបានប្រសិទ្ធភាព និងចំគោលដៅដែលត្រូវធ្វើ នាយកដ្ឋានគួររៀបចំបែងចែកក្រុមការងារជា ០៣ក្រុម ដើម្បីពង្រឹង និងអនុវត្តន៍ការងារនេះ ឲ្យទទួលបានជោគជ័យផ្លែផ្កា និងជាស្នាដៃសម្រាប់ទាំងអស់គ្នាផងដែរ ។ ឯកឧត្តម ឧត្តមសេនីយ៍ឯក មានប្រសាសន៍បន្ថែមថាៈ ការប្រយុទ្ធប្រឆាំងនឹងភេរវកម្ម មិនមែនត្រូវតែប្រយុទ្ធប្រឆាំងចំពោះក្រុមម៉ូស្លីម ឬ និកាយសាសន៍សាសនាណាមួយបានទេ គឺត្រូវតែប្រយុទ្ធប្រឆាំងទៅនឹងការប្រើប្រាស់កម្លាំងប្រដាប់ដាប់អាវុធទាំងអស់ ដែលបង្ករអោយប៉ះពាល់ដល់អាយុជីវិត និងសន្តិសុខជាតិទាំងមូល ទៅស្ថិតក្នុងនិន្នាការនយោបាយណ៍ណាក៏ដោយ ដើម្បីការពាររាល់ការផ្ទុះឡើងជាយថាហេតុនូវបាតុភាពណាមួយ…។
ឆ្លៀតក្នុងឱកាសនោះដែរ នាយកដ្ឋានការពារហេដ្ឋារចនាសម្ព័ន្ធ បានប្រកាសស្វាគមន៍ លោកអនុសេនីយ៍ទោ ហែម វណ្ណៈ នាយរងប៉ុស្តិ៍នគរបាលរដ្ឋបាលចតុមុខ ខណ្ឌដូនពេញ ដែលបានផ្ទេរភារកិច្ចមកបំរើការងារក្នុងនាយកដ្ឋានការពារហេដ្ឋារចនាសម្ព័ន្ធ ។ កិច្ចប្រជុំបានបញ្ចប់ នៅវេលាម៉ោង ១១: ០០ នាទី ព្រឹកថ្ងៃដដែល ដោយក្តីសោមនស្សរីករាយ និងសាមគ្គីភាពជាទីបំផុត ៕
