ភ្នំពេញ ៖ លេខាធិការដ្ឋានគណៈកម្មាធិការជាតិប្រឆាំងភេរវកម្ម (ទីតាំងមូលដ្ឋានទ័ពអាកាសពោធិចិនតុន) ព្រឹកថ្ងៃទី ២៥ ខែ កុម្ភៈ ឆ្នាំ ២០១៥ បានបើកវគ្គបណ្តុះបណ្តាលមួយ ស្តីពីការយល់ដឹងអំពីសិទ្ធិមនុស្ស ការគ្រប់គ្រងព័ត៌មានស៊ីវិលកម្រិតប្រតិបត្តិការ និងការធ្វើផែនការសកម្មភាពពេលមានវិបត្តិ មានរយៈពេល ០៣ថ្ងៃ គឺចាប់ពីថ្ងៃទី ២៥-២៧ ខែ កុម្ភៈ ឆ្នាំ ២០១៥ ក្រោមអធិបតីភាព ឯកឧត្តម អ៊ុឹង អៀង សមាជិក ល.គ.ជ.ប.ភ តំណាងដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ឱម យ៉ិនទៀង អនុប្រធាន ល.គ.ជ.ប.ភ និង ឯកឧត្តម ឧត្តមសេនីយ៍ឯក ហ៊ុន ម៉ាណែត អនុប្រធាន និងជាមេបញ្ជាការនៃបញ្ជាការដ្ឋានជាតិកម្លាំងពិសេសប្រឆាំងភេរវកម្ម ដោយមានការចូលរួមពីសិក្ខាកាមជាតំណាងដែលអញ្ជើញមកពី ល.គ.ជ.ប.ភ, គណៈកម្មាធិការជាតិគ្រប់គ្រងគ្រោះមហន្តរាយ,ក្រសួងការពារជាតិ,ក្រសួងមហាផ្ទៃ, ក្រសួងព័ត៌មាន និងក្រសួងរ៉ែ និងថាមពល ។ វគ្គបណ្តុះបណ្តាលនេះក៏មានការអញ្ជើញចូលរួមពីក្រុមគ្រូបង្គោលជាកងកម្លាំងប្រដាប់អាវុធសហរដ្ឋអាមេរិក (បញ្ជាការដ្ឋានប៉ាស៊ីហ្វិក) ជាអ្នកធ្វើបទបង្ហាញផងដែរ ។
ថ្លែងបើកវគ្គបណ្តុះបណ្តាលនេះ ឯកឧត្តម អ៊ុឹង អៀង សមាជិក ល.គ.ជ.ប.ភ បានមានប្រសាសន៍ស្វាគមន៍យ៉ាងកក់ក្តៅចំពោះសិក្ខាកាមដែលអញ្ជើញមកពីស្ថាប័ននានា និងក្រុមគ្រូបង្គោល ដែលបានចំណាយពេលវេលាដ៍មានតម្លៃមកចូលរួមរៀន និងបង្រៀនក្នុងវគ្គបណ្តុះបណ្តាលនេះ ។ ឯកឧត្តម ក៏បានសំណូមពរចំពោះសិក្ខាកាមទាំងអស់ឲ្យគោរពពេលវេលា និងចូលរួមឲ្យបានទាំងអស់គ្នា ព្រោះថាវគ្គសិក្សានេះមានសារៈសំខាន់ណាស់ដែលអាចឲ្យសិក្ខាកាមមានឱកាសបានស្គាល់គ្នា បង្កើនសមត្ថភាពផ្ទាល់ខ្លួនបន្ថែមទៀត និងយល់ដឹងពីគ្នាទៅវិញទៅមក ។ សរុបជារួមគឺដើម្បីឆ្លើយតបកំលាំងសរុបជាមួយនឹងឧបទ្ទវហេតុដែលកើតឡើង ។ ឯកឧត្តម បានបញ្ជាក់ថា នៅក្នុងវគ្គបណ្តុះបណ្តាលរយៈពេល ០៣ថ្ងៃនេះ គ្រូបង្គោលនឹងធ្វើបទបង្ហាញពីការយល់ដឹងអំពីសិទ្ធិមនុស្ស ក្នុងនោះបានធ្វើការបង្ហាញពី ប្រវត្តិគោលនយោបាយសិទ្ធិមនុស្ស គោលនយោបាយសិទ្ធិមនុស្ស ការការពារជាមូលដ្ឋាន គោលការណ៍ទាំងដប់នៃសិទ្ធិមនុស្ស ។ ដោយឡែកអំពីការគ្រប់គ្រងព័ត៌មានស៊ីវិលកម្រិតប្រតិបត្តិការ គ្រូបង្គោលនិងបង្ហាញពីទិដ្ឋភាពទូទៅនៃការគ្រប់គ្រងព័ត៌មានស៊ីវិល, ដំណើរការប្រតិបត្តិការ, កត្តាពិចារណាលើការគ្រប់គ្រងព័ត៌មានស៊ីវិលកម្រិតប្រតិបត្តិការ និងឧបសគ្គ រួមជាមួយនឹងការធ្វើផែនការសកម្មភាពពេលមានវិបត្តិ ។
គួរបញ្ជាក់ថា វគ្គបណ្តុះបណ្តាលដែលមានរយៈពេល ០៣ថ្ងៃ ស្តីពីការយល់ដឹងអំពីសិទ្ធិមនុស្ស ការគ្រប់គ្រងព័ត៌មានស៊ីវិលកម្រិតប្រតិបត្តិការ និងការធ្វើផែនការសកម្មភាពពេលមានវិបត្តិ នេះ គឺប្រារព្ធធ្វើឡើងចាប់ពីម៉ោង ០៩:០០ព្រឹក ដល់ ១៦:០០ល្ងាច ៕
