ភ្នំពេញ ៖ ក្នុងគោលដៅបង្កើនសមត្ថភាពបន្ថែមដល់មន្រ្តីនៅតាមស្ថាប័នដែលពាក់ព័ន្ធ ជាពិសេសសំរាប់មន្រ្តីជួរមុខអំពីបច្ចេកទេស និងនីតិវិធីនៃការប្រើប្រាស់ឧបករណ៍រាវរកសារធាតុវិទ្យុសកម្មឲ្យបានត្រឹមត្រូវ និងមានប្រសិទ្ធភាពខ្ពស់នោះ នៅព្រឹកថ្ងៃទី ០២ ខែ មីនា ឆ្នាំ ២០១៥ លេខាធិការដ្ឋានគណៈកម្មាធិការជាតិប្រឆាំងភេរវកម្ម បានរៀបចំបើកវគ្គហ្វឹកហ្វឺនមួយ ស្តីអំពីការប្រើប្រាស់ឧបករណ៍រាវរកសារធាតុវិទ្យុសកម្ម រយៈពេល ០២ថ្ងៃ ចាប់ពីថ្ងៃទី ០២-០៣ ខែ មីនា ឆ្នាំ ២០១៥នៅសណ្ឋាគារសាន់វេ រាជធានីភ្នំពេញ ដោយមានការសម្របសម្រួល និងធ្វើបទបង្ហាញដោយមន្រ្តីមកពីសហគមន៍អឺរ៉ុប និងមានការចូលរួមពីមន្រ្តីនៅក្នុងលេខាធិការដ្ឋាន គ.ជ.ប.ភ មន្រ្តីគយប្រចាំការនៅព្រលានយន្តហោះអន្តរជាតិភ្នំពេញ អាជ្ញាធរព្រលានយន្តហោះអន្តរជាតិភ្នំពេញ ចូលរួមជាច្រើនរូបផងដែរ ។
អញ្ជើញជាអធិបតី ក្នុងពិធីបើកវគ្គហ្វឹកហ្វឺននេះ ឯកឧត្តម អ៊ុឹង អៀង សមាជិក ល.គ.ជ.ប.ភ តំណាងដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ឱម យ៉ិនទៀង អនុប្រធាន ល.គ.ជ.ប.ភ បានថ្លែងការកោតសរសើរ និងថ្លែងអំណរគុណចំពោះភាគីសហគមន៍អឺរ៉ុប និងស្ថាប័នពាក់ព័ន្ធនានា ក្នុងការចូលរួមសហការដើម្បីឲ្យវគ្គហ្វឹកហ្វឺននេះទទួលបានលទ្ធផលល្អ ។ ឯកឧត្តម បន្តថា វគ្គនេះពិតជាមានសារៈសំខាន់ណាស់ ក្នុងការស្វែងយល់ពីរបៀបដំណើរការ និងការប្រើប្រាស់ឧបករណ៍រាវរកសារធាតុវិទ្យុសកម្មឲ្យបានត្រឹមត្រូវតាមលក្ខណៈបច្ចេកទេស ហើយក្រោយពីបញ្ចប់វគ្គហ្វឹកហ្វឺននេះ លេខាធិការដ្ឋាន គ.ជ.ប.ភ និងប្រគល់ ក៏ដូចជាយកឧបករណ៍នេះទៅបំពាក់នៅសាខាគយ និងរដ្ឋាករ នៅព្រលានយន្តហោះអន្តរជាតិភ្នំពេញ សំរាប់ប្រើប្រាស់ការងារជាក់ស្តែង ។ ឯកឧត្តម អ៊ុឹង អៀង បានគូសបញ្ជាក់បន្ថែមថា នេះមិនមែនជាលើកទី១ទេ ដែលការងារនេះលេខាធិការដ្ឋាន គ.ជ.ប.ភ បានចាប់ផ្តើមអនុវត្តតាំងពីឆ្នាំ ២០០៩ មកម្ល៉េះ ក្នុងនោះដោយមានការចុះកិច្ចព្រមព្រៀងអនុសារណៈនៃការយោគយល់ រវាងលេខាធិការដ្ឋាន គ.ជ.ប.ភ ក្រសួងថាមពលសហរដ្ឋអាមេរិក និងអគ្គនាយកដ្ឋានគយ និងរដ្ឋាករ ខេត្តព្រះសីហនុ ។
នៅក្នុងថ្ងៃទី១ នៃវគ្គនេះ តាមរយៈបទបង្ហាញរបស់មន្រ្តីមកពីសហគមន៍អឺរ៉ុប បានឲ្យដឹងថាចំពោះវគ្គហ្វឹកហ្វឺននេះ ក្រុមរបស់លោកនិងធ្វើការបង្ហាញពីការបង្ការមិនឲ្យមានការរត់ពន្ធសារធាតុវិទ្យុសកម្មនុយក្លេអ៊ែរ ក្នុងនោះក៏និងមានបទបង្ហាញជាបន្តបន្ទាប់អំពីការយល់ដឹងពីអាវុធមហាប្រល័យ និងការគំរាមកំហែង, ស្វែងយល់ពីរូបវិទ្យា វិទ្យុសកម្មជាមូលដ្ឋាន និងការការពារវិទ្យុសកម្ម, ទិដ្ឋភាពរួមនៃបរិក្ខាររាវរកវិទ្យុសកម្ម, ការពិនិត្យដំបូងលើឧបករណ៍រាវរកវិទ្យុសកម្ម, ការឆ្លើយតបប្រតិបត្តិការចំពោះការរាវរក ហើយក៏មានការអនុវត្តលំហាត់ជាក់ស្តែងដោយស្វែងយល់ពីឧបករណ៍ទាំងនេះផងដែរ ៕
