ភ្នំពេញ ៖ ក្រោយពីបានសិក្សាស្វែងយល់ទៅលើទ្រឹស្តី និងការអនុវត្តលំហាត់ជាក់ស្តែងដោយយកចិត្តទុកដាក់ក្នុងការប្រើប្រាស់ឧបករណ៍រាវរកសារធាតុវិទ្យុសកម្ម វគ្គហ្វឹកហ្វឺនរយៈពេល ០២ថ្ងៃកន្លងមក បានបញ្ចប់ដោយជោគជ័យ ហើយលេខាធិការដ្ឋានគណៈកម្មាធិការជាតិប្រឆាំងភេរវកម្ម បានប្រារព្ធពិធីបិទនៅរសៀលថ្ងៃទី ០៣ ខែ មីនា ឆ្នាំ ២០១៥ នេះ ។
ថ្លែងក្នុងពិធីបិទវគ្គហ្វឹកហ្វឺននេះ ឯកឧត្តម អ៊ុឹង អៀង សមាជិក ល.គ.ជ.ប.ភ ក្នុងនាម ឯកឧត្តមទេសរដ្ឋមន្រ្តី ឱម យ៉ិនទៀង បានថ្លែងការកោតសរសើរ និងថ្លែងអំណរគុណ ចំពោះភាគីសហគមន៍អឺរ៉ុប និងស្ថាប័នពាក់ព័ន្ធនានា ដែលបានប្តេជ្ញាចិត្តខ្ពស់ ចំពោះការចូលរួមជាមួយគោលនយោបាយរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី ក្នុងការចូលរួមជាមួយថ្នាក់តំបន់ និងសកលលោក ដើម្បីបង្ការ ទប់ស្កាត់ ប្រយុទ្ធប្រឆាំងជាមួយនឹងការរត់ពន្ធសារធាតុវិទ្យុសកម្ម និងនុយក្លេអ៊ែរខុសច្បាប់នេះ ហើយឯកឧត្តមក៏ស្នើសុំកិច្ចសហការបន្ថែមទៀតពីមន្ត្រីគយចំពោះការប្រើប្រាស់ឧបករណ៌នេះ ប្រសិនបើមានបញ្ហាបច្ចេកទេសណាមួយ សូមរាយការណ៍មក លេខាធិការដ្ឋានគណៈកម្មាធិការជាតិប្រឆាំងភេរវកម្ម ជាពិសេសគឺស្នើសុំការធ្វើរបបរបាយការណ៍ប្រចាំខែទាក់ទងទៅនិងការប្រើប្រាស់ឧបករណ៍ទាំងនេះ ។ ជាថ្មីម្តងទៀត ឯកឧត្តម អ៊ុឹង អៀង ក៏បានថ្លែងការអរគុណចំពោះថ្នាក់ដឹកនាំគយ តំណាងពីអាជ្ញាធរព្រលានយន្តហោះអន្តរជាតិភ្នំពេញ ម្ចាស់ជំនួយ និងក្រុមហ៊ុនខេម ដែលបានចូលរួមក្នុងវគ្គបណ្តុះបណ្តាលនេះប្រកបដោយជោគជ័យ ។
គួរបញ្ជាក់ថា នៅក្នុងថ្ងៃទី២ នៃវគ្គហ្វឹកហ្វឺននេះ សិក្ខាកាមទាំងអស់បានចូលរួមអនុវត្តលំហាត់ជាក់ស្តែង ដោយបែងចែកជាពីរក្រុម ក្នុងការប្រើប្រាស់ឧបករណ៍រាវរកសារធាតុវិទ្យុសកម្ម ORTEC និង RIID ក្នុងការកំណត់ទីតាំងរកសារធាតុវិទ្យុសកម្ម ។
មុននិងបញ្ចប់ពិធីបិទវគ្គហ្វឹកហ្វឺននេះ គណៈអធិបតី តំណាងលេខាធិការដ្ឋានគណៈកម្មាធិការជាតិប្រឆាំងភេរវកម្ម បានធ្វើពិធីប្រគល់ឧបករណ៍រាវរកសារធាតុវិទ្យុសកម្ម គិតជាទឹកប្រាក់ប្រមាណជាង ពីរសែនដុល្លាសហរដ្ឋអាមេរិក ជូនទៅតំណាងមន្រ្តីគយ ព្រលានយន្តហោះអន្តរជាតិភ្នំពេញ ៕
![02](https://i0.wp.com/www.cdn.nctc.gov.kh/2015/03/022.jpg?resize=570%2C380)
![01](https://i0.wp.com/www.cdn.nctc.gov.kh/2015/03/012.jpg?resize=570%2C380)
![04](https://i0.wp.com/www.cdn.nctc.gov.kh/2015/03/042.jpg?resize=570%2C380)
![05](https://i0.wp.com/www.cdn.nctc.gov.kh/2015/03/052.jpg?resize=570%2C380)
![03](https://i0.wp.com/www.cdn.nctc.gov.kh/2015/03/032.jpg?resize=570%2C380)
![06](https://i0.wp.com/www.cdn.nctc.gov.kh/2015/03/061.jpg?resize=570%2C380)
![07](https://i0.wp.com/www.cdn.nctc.gov.kh/2015/03/071.jpg?resize=570%2C380)
![08](https://i0.wp.com/www.cdn.nctc.gov.kh/2015/03/081.jpg?resize=570%2C380)