សៀមរាប ៖ ឧបករណ៍រាវរកសារធាតុវិទ្យុសកម្មដែលមានតម្លៃជិត ២០ ម៉ឺនដុល្លារ ជាអំណោយឧបត្ថមរបស់សហគមន៍អឺរ៉ុប តាមរយៈលេខាធិការដ្ឋានគណៈកម្មាធិការជាតិប្រឆាំងភេរវកម្ម ត្រូវបានប្រគល់ជូនសាខាគយព្រលានយន្តហោះអន្តរជាតិខេត្តសៀមរាប ដើម្បីយកទៅបំពាក់នៅព្រលានយន្តហោះអន្តរជាតិសៀមរាប ។ ពិធីប្រគល់ និងទទួលឧបកណ៍នេះ បានប្រារព្ធធ្វើឡើង នារសៀលថ្ងៃទី ០៦ ខែ មីនា ឆ្នាំ២០១៥ នៅសណ្ឋាគារអ៊ុឺមព្រេសអង្គរខេត្តសៀមរាប ក្រោមអធិបតីភាព ឯកឧត្តម អ៊ុឹង អៀង សមាជិក ល.គ.ជ.ប.ភ តំណាងដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ឱម យ៉ិនទៀង អនុប្រធាន ល.គ.ជ.ប.ភ ដោយមានការចូលរួមពីតំណាងមន្ត្រីគយព្រលានយន្តហោះអន្តរជាតិខេត្តសៀមរាប អាជ្ញាធរប្រលានយន្តហោះអន្តរជាតិសៀមរាប តំណាងក្រុមហ៊ុនខេម និងតំណាងសហគមន៍អឺរ៉ុបចូលរួមជាច្រើនរូបផងដែរ ។
ថ្លែងនៅក្នុងពិធីប្រគល់ និងទទួលឧបករណ៍រាវរកសារធាតុវិទ្យុសកម្មនេះ ឯកឧត្តម អ៊ុឹង អៀង បានមានប្រសាសន៍ថ្លែងអំណរគុណដល់សហគមន៍អឺរ៉ុប និងដៃគូរពាក់ព័ន្ធទាំងអស់ ដែលបានចូលរួមឧបត្ថមគាំទ្រធ្វើឲ្យសកម្មភាពនេះទទួលបានជោគជ័យជាបន្តបន្ទាប់ ។ ឯកឧត្តម បានបន្តថា នេះជាផ្នែកមួយនៃការអនុវត្តគោលនយោបាយរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី បានប្តេជ្ញាក្នុងការចូលរួមជាមួយថ្នាក់តំបន់ និងសកលលោក ដើម្បីបង្ការ ទប់ស្កាត់ ប្រយុទ្ធប្រឆាំងនិងការរត់ពន្ធដោយខុសច្បាប់នូវសារធាតុវិទ្យុសកម្ម នុយក្លេអ៊ែរ និងអំពើភេរវកម្ម ។ ឯកឧត្តម ក៏បានស្នើសុំកិច្ចសហការបន្ថែមទៀតពីមន្ត្រីគយទាក់ទងនិងការប្រើប្រាស់ឧបករណ៍ទាំងនេះ ប្រសិនបើមានបញ្ហាណាមួយសូមរាយការណ៍មក លេខាធិការដ្ឋានគណៈកម្មាធិការជាតិប្រឆាំងភេរវកម្ម ជាពិសេសស្នើសុំឲ្យមានការធ្វើរបបរបាយការណ៍ប្រចាំខែ អំពីការប្រើប្រាស់ឧបករណ៍នេះ ។
គួរបញ្ជាក់ថា មុននិងធ្វើការប្រគល់ឧបករណ៍រាវរកសារធាតុវិទ្យុសកម្មនេះ លេខាធិការដ្ឋានគណៈកម្មាធិការជាតិប្រឆាំងភេរវកម្ម បានបើវគ្គហ្វឹកហ្វឺនរយៈពេល ០២ថ្ងៃ (០៥-០៦ ខែ មីនា ឆ្នាំ២០១៥) ជូនដល់មន្ត្រីពាក់ព័ន្ធទាំងអស់ ដោយមានការចូលរួមសម្របសម្រួល និងធ្វើបទបង្ហាញពីតំណាងសហគមន៍អឺរ៉ុប ស្តីអំពីបច្ចេកទេស និងរបៀបនៃការប្រើប្រាស់ព្រមជាមួយការអនុវត្តលំហាត់ជាក់ស្តែងទៅលើឧបករណ៍ទាំងនេះផងដែរ ៕
