ភ្នំពេញ ៖ ព្រឹកថ្ងៃទី ១៥ ខែ កក្កដា ឆ្នាំ ២០១៥ នៅបញ្ជាការដ្ឋានជាតិកម្លាំងពិសេសប្រឆាំងភេរវកម្ម ទីតាំងមូលដ្ឋានទ័ពអាកាសពោធិ៍ចិនតុង បានបើកវគ្គបណ្តុះបណ្តាលស្តីអំពីការពង្រឹងស្មារតី និងភាពជាអ្នកដឹកនាំជូនដល់មន្រ្តីនៅក្នុងបញ្ជាការដ្ឋាន ដែលឧទេ្ទសនាមដោយ លោក ឃឹម សុខហេង នាយកវិទ្យាស្ថានសិក្សាដើម្បីជោគជ័យ ។ វគ្គបណ្តុះបណ្តាលនេះមានរយះពេល ១ ថ្ងៃពេញ ដែលមានការចូលរួមពីបណ្តាមន្រ្តី និងកងកំលាំងយោធាគ្រប់នាយកដ្ឋានចំណុះ ល.គ. ជ.ប.ភ សរុបមានចំនួន ៣១១ នាក់ ។
ឯកឧត្តមឧត្តមសេនីយឯក ប៊ុត សុភាព មេបញ្ជាការរងកម្លាំងពិសេសប្រឆាំងភេរវកម្ម បានធ្វើការសំណេះសំណាលជាមួយមន្រ្តី និងកងកំលាំងយោធាគ្រប់ជាន់ថ្នាក់នៃ ល.គ.ជ.ប.ភ និងណែនាំឲ្យមន្រ្តី និងកងកំលាំងយោធាគ្រប់រួបត្រូវតែបន្ថែមការស្វែងយល់ ដោយខិតខំប្រឹងប្រែងរៀនសូត្របន្ថែម ត្រូវមានភាពស្មោះត្រង់ និងមានទំនួលខុសត្រូវខ្ពស់ចំពោះកិច្ចការងាររបស់ខ្លួន ។បន្ទាប់មកលោកគ្រូ ឃឹម សុខហេង នាយកវិទ្យាស្ថានសិក្សាដើម្បីជោគជ័យ បានចាប់ផ្តើមបើកកម្មវិធីបណ្តុះបណ្តាល ដោយលោកបានផ្តោតសំខាន់ទៅលើការពង្រឹងនិងពង្រីកសមត្ថភាពរបស់ខ្លួន ដោយត្រូវអភិវឌ្ឍចំនេះដឹងបន្ថែម ឲ្យមានភាពស្មោះត្រង់ចំពោះការងារ និងថ្នាក់ដឹកនាំនិងមានទំនួលខុសត្រូវខ្ពស់ ។
វគ្គបណ្តុះបណ្តាលពេញមួយថ្ងៃនេះបានបញ្ចប់នៅវេលាម៉ោង ៤:៣០ នាទី រសៀល ប្រព្រឹត្តទៅដោយភាពសោមនស្សរីករាយ និងការចួលរួមយ៉ាងសកម្មពីមន្រ្តី និងកងកំលាំងយោធាគ្រប់នាយកដ្ឋាននៃលេខាធិការដ្ឋាន គ.ជ.ប.ភ ៕
