ប្រភពព័ត៌មាន CNN ចេញផ្សាយថ្ងៃទី ១៨ ខែ សីហា ឆ្នាំ ២០១៥ ម៉ោង ០២:៥៦ នាទី
ទីក្រុងបាងកក ប្រទេសថៃ ៖ អាជ្ញាធរបាននិយាយថា ការបំផ្ទុះគ្រាប់បែកមួយដ៏ធំដែលបានផ្ទុះឡើងនៅទីកន្លែងសក្ការៈបូជាហិណ្ឌូ ដែលស្ថិតនៅចំកណ្តាលទីក្រុងបាងកក បានសម្លាប់មនុស្សយ៉ាងហោចណាស់ ២២នាក់ និង ១២០នាក់ផ្សេងទៀតរងរបួសកាលពីថ្ងៃចន្ទម្សិលមិញនេះ ។
មន្ត្រីប៉ូលីសបានឲ្យដឹងថា ជនរងគ្រោះ ១០នាក់ បានស្លាប់ភ្លាមៗនៅកន្លែងកើតហេតុ និង ១០នាក់ផ្សេងទៀតបានស្លាប់នៅពេលបញ្ជូនទៅដល់មន្ទីរពេទ្យក្នុងតំបន់ ។
លោក Sanjeev Vyas DJ មកពីទីក្រុងម៉ុមបៃ ប្រទេសឥណ្ឌា និងជាជនរងគ្រោះដែលស្ថិតនៅកន្លែងកើតហេតុបានឲ្យដឹងថា វាដូចជាខ្យល់ និងផ្លេកបន្ទោរដ៏ធំ ជាមួយនឹងកំទិចកំទីជាច្រើនហោះកាត់អ្នក ហើយបន្ទាប់មកខ្ញុំឃើញសាកសពគ្រប់ទីកន្លែង ភ្លើងឆេះរថយន្ដ កង់រប៉ាត់រប៉ាយ និងសម្លេងមនុស្សស្រែក ។ មន្រ្តីនាំពាក្យប៉ូលីស លោកឧត្តមសេនីយ៍ Prawut Thavornsiri បានប្រាប់ទូរទស្សន៍ Channel 3 នៅព្រឹកមិញនេះថា យ៉ាងហោចណាស់មនុស្ស ២២នាក់ត្រូវបានស្លាប់ ដែលនេះជាតួលេខចុងក្រោយនៃចំនួនអ្នកស្លាប់ ។ មានជនបរទេសជាច្រើននាក់ទៀត ក៍ស្ថិតនៅក្នុងចំណោមអ្នកស្លាប់ និងរបួសនេះដែរ ។ មជ្ឈមណ្ឌលសង្រ្គោះបន្ទាន់ Erawan បានឲ្យដឹងថា ជនជាតិហ្វីលីពីន និងចិន ស្ថិតក្នុងចំណោមអ្នកស្លាប់ទាំង ២២ នាក់នោះ។
ប្រធានមន្រ្តីប៉ូលីសជាតិលោក Somyot Pumpanmuang បាននិយាយតាមទូរទស្សន៍ជាតិថា ភ្ញៀវទេសចរណ៍ចិនដែលមកពីប្រទេសហ្វីលីពីន និងធ្វើដំណើរទៅប្រទេសថៃ ត្រូវបានស្លាប់ក្នុងហេតុការណ៍នេះ ។
ស្ថានទូតចិននៅក្នុងទីក្រុងបាងកក បានប្រាប់ទីភ្នាក់ងារសារព័ត៌មានចិនស៊ីនហួរថា ជនជាតិចិនចំនួន ០៣នាក់ បានស្លាប់ភ្លាមៗក្នុងការបំផ្ទុះនេះ និង ១៥នាក់ផ្សេងទៀតរងរបួស ៕
