ប្រភពព័ត៌មាន Bangkok Post ចេញផ្សាយថ្ងៃទី ១៨ ខែ សីហា ឆ្នាំ ២០១៥ ម៉ោង ០៩:៣២នាទី
បាងកក ប្រទេសថៃ ៖ កាលពីព្រឹកមិញនេះមន្ត្រីប៉ូលីសក្រុងបាងកក បានធ្វើការកែសម្រួលចំនួនមនុស្សស្លាប់ពីការបំផ្ទុះគ្រាប់បែកកាលពីរាត្រីថ្ងៃចន្ទ នៅទីកន្លែងសក្ការៈបូជា Erawan ក្នុងក្រុងបាងកក ដោយចំនួនមនុស្សស្លាប់ពិតប្រាកដគឺ ២០ នាក់ក្នុងនោះមានជនជាតិចិន ០២នាក់ និងជនជាតិហ្វីលីពីន ០១នាក់ ។ អ្នកនាំពាក្យម្នាក់បាននិយាយថាមនុស្សចំនួន ១២៥ នាក់ផ្សេងទៀតបានរងរបួស និងកំពុងត្រូវការជំនួយពីពេទ្យ ។
មន្រ្តីនាំពាក្យប៉ូលីសលោក Gen Prawut Thavornsiri បានឱ្យដឹងនៅក្នុងបទសម្ភាសទូរទស្សន៍ មួយកាលពីព្រឹកមិញនេះថា របាយការណ៍អំពីចំនួនមនុស្សស្លាប់ ២២នាក់នោះមិនមែនជាព័ត៌មានច្បាស់ការណ៍នោះទេ ព្រោះជាការយល់ច្រឡំលើការកំណត់អត្តសញ្ញាណសាកសព ។ លេខាធិការសុខភាពអចិន្ត្រៃយ៍លោក Narong Sahametapat និងគ្រូពេទ្យបានប្រាប់ទីភ្នាក់ងារសារព័ត៌មានអាឡឺម៉ង់ DPA ថា នៅតែមានការយល់ច្រឡំមួយចំនួននៅព្រឹកមិញនេះ ។ លោកវេជ្ជបណ្ឌិត Phetphong Kamjornjitjakarn បាននិយាយថា មានមនុស្សជាច្រើននៅក្នុងមន្ទីរពេទ្យដែលយើងមិនទាន់អាចកំណត់សញ្ជាតិបាននៅឡើយ ។ ពួកគេនៅមិនទាន់មានស្មារតីគ្រប់គ្រាន់ ហើយក៍មិនបានដាក់អត្តសញ្ញាណជាប់ខ្លួននៅពេលកើតឧបទ្ទវហេតុនេះ ។ លោកវេជ្ជបណ្ឌិត Narong បានប្រាប់ប្រព័ន្ធផ្សព្វផ្សាយថា “ជនរងគ្រោះដែលក្មេងជាងគេនាពេលបច្ចុប្បន្នគឺមានអាយុ ៥ ឆ្នាំជាជនជាតិចិនរងរបួសក្បាល” ។ លោកបានបន្ថែមទៀតថា ជនរងគ្រោះមួយចំនួនត្រូវបានអនុញ្ញាតឲ្យចេញពីមន្ទីពេទ្យប៉ុន្តែមួយចំនួនទៀតដែលនូវទទួលរងនូវភាពរន្ធត់ និងរលាក កំពុងតែស្ថិតនៅក្នុងមន្ទីរពេទ្យនៅឡើយ ៕