ប្រភពព័ត៌មានពីបណ្តាញសារព័ត៌មាន CNN ចេញផ្សាយថ្ងៃទី ២១ ខែ តុលា ឆ្នាំ ២០១៥
អនាគតមេដឹកនាំថ្មីរបស់ប្រទេសកាណាដាបាននិយាយថា លោកមានបំណងធ្វើតាមពាក្យសន្យារបស់លោកដើម្បីទាញយកប្រទេសចេញពីយុទ្ធនាការទម្លាក់គ្រាប់បែកដែលដឹកនាំដោយសហរដ្ឋអាមេរិកប្រឆាំងនឹងពួកសកម្មប្រយុទ្ធ ISIS នៅក្នុងប្រទេសស៊ីរីនិងអ៊ីរ៉ាក់។ លោក Justin Trudeau មេដឹកនាំគណបក្សសេរីនិយមដែលទទួលជ័យជម្នះក្នុងការបោះឆ្នោតកាលពីថ្ងៃចន្ទ បាននិយាយថាគាត់បានប្រាប់លោកប្រធានាធិបតីបារ៉ាក់អូបាម៉ារួចហើយអំពីផែនការរបស់លោក។ លោក Trudeau បានប្រាប់អ្នកកាសែតកាលពីថ្ងៃអង្គារដោយមិនបានបញ្ជាក់អំពីពេលវេលាច្បាស់លាស់សម្រាប់ការបញ្ជប់ការវាយប្រហារតាមអាកាសរបស់ប្រទេសកាណាដាថា៖ ខ្ញុំយល់អំពីការប្តេជ្ញាចិត្តដែលខ្ញុំបានធ្វើនៅជុំវិញការបញ្ចប់បេសកកម្មប្រយុទ្ធនេះ។ លោក Trudeau ត្រូវបានរំពឹងថានឹងឡើងកាន់តំណែងនៅសប្តាហ៍ខាងមុខនេះ ជំនួសលោកនាយករដ្ឋមន្រ្តី Stephen Harper ដែលបានចាត់យន្តហោះចម្បាំងរបស់ប្រទេសកាណាដាដើម្បីវាយប្រហារប្រឆាំងនឹងក្រុម ISIS នោះ។ ការវាយប្រហារទម្លាក់គ្រាប់បែករបស់ប្រទេសកាណាដាបានចាប់ផ្តើមវាយប្រហារទីតាំងក្រុមជ្រុលនិយមអ៊ីស្លាមនៅក្នុងប្រទេសអ៊ីរ៉ាក់កាលពីខែវិច្ឆិកាឆ្នាំ ២០១៤ និងពង្រីកបន្តចូលទៅក្នុងប្រទេសស៊ីរីក្នុងខែមេសាកន្លងទៅ។ កាលពីសប្តាហ៍មុនក្រុមអ្នកប្រយុទ្ធ Hornet របស់ប្រទេសកាណាដាចំនួន ៦ នៅក្នុងតំបន់នេះបានហោះចំនួន ១.០៤៦ ជើងក្នុងប្រតិបត្ដិការប្រឆាំងនឹងក្រុម ISIS នេះបើយោងតាមយោធាដែលមិនបានបញ្ជាក់អំពីចំនួនយន្តហោះដែលវាយប្រហារនោះទេ។ លោក Trudeau បានឱ្យដឹងថាកាលពីថ្ងៃអង្គារថា ប្រទេសកាណាដានឹងនៅតែជាសមាជិកដ៏ខ្លាំងមួយនៃក្រុមចម្រុះនេះ ដើម្បីប្រឆាំងនឹងក្រុមឧទ្ទាម ISIS ប៉ុន្តែនឹងចូលរួមក្នុងដោយការទទួលខុសត្រូវ។ ដៃគូរបស់បណ្តាញសារព័ត៌មាន CNN CBC បានរាយការណ៍ថា គណបក្សរបស់លោកចង់ផ្ដល់ជំនួយបន្ថែមទៀតនៅក្នុងប្រទេសអ៊ីរ៉ាក់និងប្រទេសស៊ីរីនិងសម្រាប់យោធាកាណាដាដើម្បីចូលរួមក្នុងការហ្វឹកហាត់ជាជាងបេសកកម្មទម្លាក់គ្រាប់បែកនេះ។ សេចក្តីថ្លែងការណ៍ចេញពីសេតវិមានលើការហៅទូរស័ព្ទរវាងលោកអូបាម៉ានិងលោក Trudeau មិនបាននិយាយអំពីការដកខ្លួនចេញពីយុទ្ឋនាការលើអាកាសរបស់ប្រទេសកាណាដានោះទេ។ វាបាននិយាយថា មេដឹកនាំទាំងពីរប្តេជ្ញាពង្រឹងកិច្ចខិតខំប្រឹងប្រែងរបស់ប្រទេសទាំងពីររួមគ្នានៅលើការប្រយុទ្ធប្រឆាំងនឹងភេរវកម្មនិងបញ្ហាផ្សេងទៀត។ ប្រទេសផ្សេងទៀតដែលបានចូលរួមក្នុងការវាយប្រហារតាមអាកាសដែលដឹកនាំដោយសហរដ្ឋអាមេរិកប្រឆាំងនឹងក្រុមឧទ្ទាម ISIS នោះរួមមានប្រទេសអូស្រ្តាលី ប្រទេសបារាំង និងចក្រភពអង់គ្លេសក៏ដូចជាប្រទេសដែលនៅឈូងសមុទ្រ ប្រទេសអារ៉ាប៊ីសាអូឌីតនិងយ័រដាន់។ កាលពីដើមខែតុលា ក្រុមចម្រុះនេះបានអនុវត្តការវាយប្រហារជាង ៧.០០០ ដងក្នុងនោះជិតពីរភាគបីនៃការវាយប្រហារគឺនៅក្នុងប្រទេសអ៊ីរ៉ាក់ នេះបើយោងតាមមន្ទីរបញ្ចកោណ។ យោធាសហរដ្ឋអាមេរិកដំណើរការការវាយប្រហារប្រហែលជា ៨០% នៃការវាយប្រហារទាំងអស់។
