ពួកសកម្មប្រយុទ្ធប្រទេសម៉ាឡេស៊ីមានគម្រោងបង្កើតបក្សពួកក្រុម ISIS នៅក្នុងតំបន់អាស៊ីអាគ្នេយ៍

November 16, 2015

ប្រភពព័ត៌មានពីបណ្តាញសារព័ត៌មាន Straits Times ចេញផ្សាយថ្ងៃទី ១៦ ខែ វិច្ឆិកា ឆ្នាំ ២០១៥

ក្រុមប្រដាប់អាវុធជ្រុលនិយមម៉ាឡេស៊ីដែលកំពុងលាក់ខ្លួននៅភាគខាងត្បូងប្រទេសហ្វីលីពីនបានប្រកាសពីគម្រោងបង្កើតសាខារបស់ក្រុមឧទ្ទាមរដ្ឋឥស្លាមនៅប្រទេសអ៊ីរាក់ និងស៊ីរី ហៅកាត់ថា ISIS ថ្មីនៅអាស៊ីអាគ្នេយ៍ ដោយបានប្រមូលរាល់ក្រុមប្រដាប់អាវុធនិងក្រុមភេរវករទាំងអស់ទូទាំងតំបន់។ អតីតគ្រូសាកលវិទ្យាល័យ ម៉ាឡាយ៉ា Mahmud Ahmad ដែលកំពុងលាក់ខ្លួននៅភាគខាងត្បូងប្រទេសហ្វីលីពីនបានប្រកាសថាខ្លួនមានគម្រោងបង្កើតសាខាថ្មីរបស់ក្រុមឧទ្ទាមរដ្ឋឥស្លាម ISIS នេះនៅអាស៊ីអាគ្នេយ៍។ គោលបំណងសំខាន់របស់ភេរវករខាងលើគឺប្រមូលផ្តុំបណ្តាភេរវករ និងក្រុមសកម្មប្រយុទ្ធប្រចាំតំបន់ផ្សេងៗដូចជា ហ្វីលីពីន ម៉ាឡេស៊ី ឥណ្ឌូនេស៊ី និងក្រុមឧទ្ទាមភាគខាងត្បូងប្រទេសថៃ ក្នុងនោះមានទាំងក្រុមភេរវកម្ម Jemaah Islamiah និងក្រុម Abu Sayyaf។ ក្រៅពីនេះ ក្រុមភេរវកម្មផ្សេងទៀតនៅក្នុងតំបន់រួមមានដូចជា Tanzim Al-Qaeda Kumpulan Mujahidin Malaysia និង Darul Islam Sabah។ ក្រុមភេរវករខាងលើកំពុងតែស្ថិតនៅក្រោមការតាមប្រមាញ់របស់អាជ្ញាធរប្រចាំតំបន់។ បច្ចុប្បន្នមេដឹកនាំក្រុមភេរវកម្មនេះ មានលទ្ធភាពខ្ពស់ក្នុងការប្រមូលអ្នកគាំទ្រឲ្យចូលរួមចលនារបស់ខ្លួន ដោយសារគេអាចប្រើប្រាស់តួនាទីដែលជាគ្រូបង្រៀនដែល ធ្លាប់បានទទួលការបណ្តុះបណ្តាលពី Al-Qaeda នៅក្នុងប្រទេសអាហ្វហ្គានីស្ថាននៅចុងទស្សវត្យឆ្នាំ ១៩៩០ ។ គួរបញ្ជាក់ផងដែរថាដើម្បីបង្កើតសាខាថ្មីរបស់ក្រុមឧទ្ទាម ISIS មេដឹកនាំនិមួយៗត្រូវតែស្បថចំពោះមុខមេដឹកនាំកំពូលរបស់ក្រុមឧទ្ទាម ISIS គឺលោក Abu Bakr al-Baghdadi ដើម្បីបង្ហាញពីភាពស្មោះត្រង់។ ដូច្នេះគោលដៅធំរបស់មេដឹកនាំក្រុមជ្រុលនិយមរបស់ប្រទេសម៉ាឡេស៊ីនេះគឺនឹងចាកចេញទៅកាន់ប្រទេសស៊ីរីនាពេលខាងមុខ។

ប្រធានផ្នែកប៉ូលីសប្រឆាំងភេរវកម្មពិសេសម៉ាឡេស៊ីបាននិយាយ Mahmud ដែលមានឈ្មោះក្នុងបញ្ជីចាប់ខ្លួន មិនពេញចិត្តត្រឹមតែចូលរួមជាមួយក្រុម Abu Sayyaf នោះទេ តែចង់បង្កើត សាខាក្រុម ISIS ក្នុងតំបន់អាស៊ីអាគ្នេយ៍ ។ លោកក៏បានព្រមានដែរថា បើសិនជា Mahmud ដែលគេស្គាល់ថាជា Abu Handzalah ទទួលបានជោគជ័យក្នុងការបង្កើតសាខាថ្មីនៅអាស៊ីអាគ្នេយ៍ តំបន់អាស៊ីអាគ្នេយ៍នឹងរងគ្រោះថ្នាក់ធំៗជាច្រើនមិនខាន។ យ៉ាងណាក៏ដោយ អ្នកជំនាញខាងសន្តិសុខប្រទេសហ្វីលីពីនលោក Jose Antonio Custodio មានជំនឿថាពួកសកម្មប្រយុទ្ធដែលប្រើទង់ ISIS គឺគ្រាន់តែជាឈ្នាន់ដើម្បីទទួលបានការគាំទ្របន្ថែមទៀតពីបរទេស និងការគាំទ្រផ្នែកហិរញវត្ថុតែប៉ុណ្ណោះ។ ក្រុមនេះពិបាករកការគាំទ្រពីបណ្តាក្រុមជ្រុលនិយមផ្សេងៗប្រចាំតំបន់ខ្លាំងណាស់ ដោយសារនៅទីនេះ (ប្រទេសហ្វីលីពីន) មិនមានសង្គ្រាមដូចនៅ ប្រទេសស៊ីរី។

សាស្រ្តាចារ្យ Sundramoorthy ដែលជាអ្នកស្រាវជ្រាវមកពីក្រុមការងារឧក្រិដ្ឋកម្មនិងប៉ូលិសមកពី University Sains Malaysia បាននិយាយថាពួកសកម្មប្រយុទ្ធទាំងនេះបានទៅហួសពីវិសាលភាពនៃសាសនាហើយ។ មនុស្សជាច្រើននៅតែគិតថា សិទ្ធិរបស់សាសនាអ៊ីស្លាមគឺជាម្ចាស់ជើងឯក IS ប៉ុន្តែវាមានដូចជាភាពមិនស្មើគ្នាក្នុងសង្គម, វិសមភាពសេដ្ឋកិច្ច ការជិះជាន់ខាងនយោបាយ និងហេតុផលផ្សេងទៀត។ ប៉ុន្តែជាអកុសលសាសនានេះបានប្រើជាយុថ្កាដើម្បីជម្រុញទឹកចិត្តពួកគេ។ ដើម្បីទប់ស្កាត់ការរីកលូតលាស់នៃក្រុមភេរវកម្មបែបនេះ សាស្រ្តាចារ្យ Sundramoorthy បាននិយាយថា កិច្ចខិតខំប្រឹងប្រែងជាអន្តរជាតិ គឺជាតម្រូវការដ៏ចាំបាច់ដើម្បីដោះស្រាយឫសគល់នៃបញ្ហា ដូចជាភាពអយុត្តិធមក្នុងសង្គម ដើម្បីការពារកុំឱ្យមានការបែកបាក់នៅក្នុងសង្គមដែលអាចនាំឱ្យមានបញ្ហាភេរវកម្ម។

គួរបញ្ចាក់ផងដែរថានៅដើមឆ្នាំនេះប៉ូលីសម៉ាឡេស៊ី បំផ្លាញផែនការភេរវកម្ម ISIS ក្នុងការវាយប្រហារស្ថានទូតអារ៉ាប៊ីសាអូឌីត និងកាតារនៅទីក្រុងគូឡាឡាំពួ។ ពួកគេចាប់និងនិរទេសខ្លួនអ្នកស្រុកម៉ាល់ឌីវប្រាំនាក់ ក្នុងនោះរួមមាន ជនជាប់សង្ស័យ ដែលគេជឿថា បានចូលរួមនៅក្នុងការប៉ុនប៉ងធ្វើឃាតទៅលើលោកប្រធានាធិបតីម៉ាល់ឌីវ Abdulla Yameen ។