ឯកសារពិពណ៌នាអំពីឧប្បត្តិហេតុឆ្នាំ២០១៧ ដែលមានមនុស្សបានធ្វើការមើលពីចម្ងាយលើសកម្មភាពផ្ទាល់របស់ប៉ូលិសដែលកំពុងរៀបចំបំពេញការងារលើដីកាស្វែងរក។ គេរកឃើញព័ត៌មាននេះតាមអ៊ិនធឺរណិតលើគេហទំព័រ The Intercept ក្នុងចំណោមឯកសារដែលគេលួចយកបាន។
ពីមុនមកធ្លាប់មានអ្នកតស៊ូមតិឯកជនបានលើកឡើងពីការព្រួយបារម្ភអំពីទិន្នន័យរបស់អ្នកបើកទ្វារឆ្លាត ដែលអ្នកប្រើប្រាស់ចែកចាយជាមួយប៉ូលិស។ ឯកសារដែលគេលួចបានមានឈ្មោះថា BlueLeaks ដែលត្រូវបានគេលួចពីគេហទំព័រប៉ូលិសមានចំនួនច្រើនជាង២៥០គេហទំព័រ ។
ឯកសារមួយចំនួនគឺជាព្រឹត្តិប័ត្រវិភាគបច្ចេកទេសផ្តល់ជូននូវទិដ្ឋភាពទូទៅនៃឱកាសនិងបញ្ហាប្រឈមរបស់ប៉ូលិសលើប្រព័ន្ធសន្តិសុខតាមផ្ទះ និងទ្វារឆ្លាតវៃ។ ឧប្បត្តិហេតុឆ្នាំ ២០១៧ បង្ហាញថា មាននរណាម្នាក់កំពុងស្ថិតក្នុងការស៊ើបអង្កេតអាចធ្វើការតាមដានសកម្មភាពអនុវត្តច្បាប់នៅពេលដែលមន្ត្រីអនុវត្តច្បាប់មានដីកា និងជូនដំណឹងដល់អ្នកជិតខាង និងម្ចាស់ផ្ទះរបស់គាត់។ គេមិនបានបង្ហាញពីយីហោទ្វារនៅក្នុងឃ្លីបវីដេអូដែលបង្ហោះនោះទេ។
កណ្តឹងមួយរបស់ក្រុមហ៊ុន Amazon គឺជាកណ្តឹងមួយដែលពេញនិយមបំផុត ប៉ុន្តែមានក្រុមហ៊ុនជាច្រើនផ្សេងទៀតដែលលក់ឧបករណ៍គោះទ្វារឆ្លាតវៃនិងឧបករណ៍តាមដានដាក់តាមផ្ទះផងដែរ។
វាគឺជារឿងគួរឱ្យចាប់អារម្មណ៍មួយចំពោះកណ្តឹងគោះទ្វារឆ្លាតវៃ។ នៅឆ្នាំមុន មានការព្រួយបារម្ភអំពីចំនួនព័ត៌មានចេញពីកាមេរ៉ាឯកជនត្រូវបានចែកចាយជាមួយប៉ូលិស។ លើសពីនោះនៅឆ្នាំមុនផងដែរ ក្រុមហ៊ុន Amazon រងការរិះគន់ចំពោះភាពជាដៃគូជាមួយភ្នាក់ងារអនុវត្តច្បាប់យ៉ាងហោចណាស់២០០នាក់របស់សហរដ្ឋអាមេរិកដើម្បីអនុញ្ញាតឱ្យមានការឆែកឆេរតាមកណ្តឹងទ្វារ។
ក្រោមកិច្ចសហការជាដៃគូ មន្ត្រីប៉ូលិសអាចស្នើសុំឱ្យអតិថិជនចែករំលែកវីដេអូ និងព័ត៌មានអំពីឧក្រិដ្ឋកម្មនៅក្នុងតំបន់របស់ពួកគេ។
នៅពេលនោះក្រុមសិទ្ធិឌីជីថល Fight the Future បាននិយាយថា ការធ្វើបែបនេះ ធ្វើឱ្យប៉ះពាល់ដល់ដំណើរការប្រជាធិបតេយ្យ និងសេរីភាពស៊ីវិលមូលដ្ឋាន។
ចំណែកឯករណីនៅចក្រភពអង់គ្លេស ប៉ូលិស Wiltshire បានបង្កើតមូលដ្ឋានទិន្នន័យពីឧបករណ៍ការពារទ្វារសុវត្ថិភាពឯកជន និងកាមេរ៉ាសុវត្ថិភាព ហើយអ្នកប្រើប្រាស់កំពុងត្រូវបានសមត្ថកិច្ចស្នើសុំឱ្យចុះឈ្មោះរបស់ពួកគេផងដែរ។
ប្រែសម្រួល៖ ប៉ោក លក្ខិណា
ប្រភពព័ត៌មាន bbc ផ្សយថ្ងៃទី០២ ខែកញ្ញា ឆ្នាំ២០២០
