នៅថ្ងៃចន្ទ ទី១៤ ម្សិលមិញនេះ កងទ័ពថៃបានច្រានចោលចំពោះសារក្លែងក្លាយមួយដែលផ្សព្វផ្សាយនៅលើបណ្តាញសង្គមថា កងកម្លាំង First Army Area បានត្រៀមទាហាន និងប្រដាប់ប្រដាកុបកម្មប្រឆាំងនឹងបាតុកម្មនិស្សិតដែលបានគ្រោងទុកនៅក្នុងសង្កាត់របស់ខ្លួនក្នុងទីក្រុងបាងកកនៅចុងសប្តាហ៍ខាងមុខនេះ។
អ្នកនាំពាក្យកងទ័ព លោកវរសេនីយ៍ឯក Winthai Suvaree បានច្រានចោលចំពោះសារមេរោគនោះថា ជាព័ត៌មានក្លែងក្លាយពីព្រោះនៅក្នុងសារនោះពុំមានបញ្ជាក់ពីកាលបរិច្ឆេទ និងមិនមានការចុះហត្ថលេខាពីមន្ត្រីបញ្ជាការណាមួយរបស់កងកម្លាំង First Army Area។
វរសេនីយ៍ឯក Winthai មានប្រសាសន៍ថា សារផ្លូវការពិតប្រាកដមួយត្រូវមានចុះកាលបរិច្ឆេទ និងត្រូវមានចុះហត្ថលេខាដោយមន្ត្រីទទួលបន្ទុកម្នាក់។លោកបន្ថែមថា កងកម្លាំង First Army Area មិនទាន់ទទួលបានការបញ្ជាពីរដ្ឋាភិបាល ឬការដំឡើងឋានៈខ្ពស់ណាមួយនៅក្នុងជួរកងទ័ពដើម្បីរៀបចំបេសកកម្មនៅចំពោះមុខការតវ៉ារបស់និស្សិតដែលបានគ្រោងទុកនោះទេ។
សារដែលផ្សព្វផ្សាយនៅលើបណ្តាញសង្គមនៅចុងសប្តាហ៍មានសេចក្តីថា កងកម្លាំង First Army Area ត្រៀមទាហានរបស់ខ្លួនបំពាក់ដោយមួកសុវត្ថិភាព អាវការពារកាំភ្លើង ដំបងឧស្ម័នបង្ហូរទឹកភ្នែក និងកាំភ្លើងជាមួយគ្រាប់កាំភ្លើងជ័រដើម្បីដោះស្រាយស្ថានការណ៍នៅចំពោះមុខនិស្សិតដែលកំពុងតវ៉ា។
កងកម្លាំង First Army Area ស្ថិតនៅលើផ្លូវ Ratchadamnoen និងមានចម្ងាយតិចជាងកន្លះគីឡូម៉ែត្រពីវិមានរដ្ឋាភិបាល ហើយក្រុមអ្នកតវ៉ានាំមុខមានគម្រោងនឹងប្រមូលផ្តុំគ្នានៅខាងក្រៅនៅថ្ងៃអាទិត្យនេះ។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៤ ខែកញ្ញា ឆ្នាំ២០២០
