Nathan Wyatt អាយុ ៣៩ឆ្នាំ ជាជនជាតិអង់គ្លេសបានសារភាពចំពោះតួនាទីរបស់គាត់នៅក្នុងក្រុម “Hacker Overlord” ដែលបានឃុបឃិតគ្នាលួចទិន្នន័យផ្ទាល់ខ្លួននិងវេជ្ជសាស្ត្រ។ គាត់ត្រូវបានកាត់ទោសឱ្យជាប់ពន្ធនាគារសហព័ន្ធរយៈពេល ៥ ឆ្នាំ។
The Dark Overlord គឺជាក្រុមហេគដ៏ល្បីដែលមានជំនាញក្នុងការលួចយកព័ត៌មានសំខាន់និងគំរាមកំហែងដល់ជនរងគ្រោះដែលមានការប៉ះពាល់លើកលែងតែជនរងគ្រោះបានធ្វើការបង់ថ្លៃលោះ។ ក្រុមនេះបានហេគអង្គការជាច្រើននៅសហរដ្ឋអាមេរិក និងចក្រភពអង់គ្លេសដើម្បីលួចយកទិន្នន័យ និងគំរាមកំហែងពួកគេសម្រាប់ការបង់ប្រាក់លោះ។ ចំនួនគោលដៅរបស់អង្គការរួមមានអង្គភាពថែទាំសុខភាពហិរញ្ញវត្ថុ អង្គភាពច្បាប់ ភាពយន្ត និងផ្សេងៗទៀត។
លោក Nathan Wyatt ត្រូវគេធ្វើបត្យាប័នពីចក្រភពអង់គ្លេសទៅសហរដ្ឋអាមេរិកនៅថ្ងៃទី១៩ ខែធ្នូ ឆ្នាំ២០១៩ យោងទៅតាមឯកសាររបស់តុលាការគាត់បានដើរតួនាទីយ៉ាងសំខាន់ក្នុងសកម្មភាពហេគ។
យោងតាមការចោទប្រកាន់ The Dark Overlord បានបង្កផលប៉ះពាល់ដល់និយោជិករាប់មិនអស់នៅសហរដ្ឋអាមេរិកដែលភាគច្រើននៃពួកគេរងផលប៉ះពាល់ម្តងហើយម្តងទៀត។
ជំនួយការមេធាវីស្តីទីនៃការិយាល័យព្រហ្មទណ្ឌនៃក្រសួងយុត្តិធម៌លោក Brian C. Rabbitt នៃនាយកដ្ឋានព្រហ្មទណ្ឌនៃនាយកដ្ឋានយុត្តិធម៌មានប្រសាសន៍ថា៖ “Nathan Wyatt បានប្រើជំនាញបច្ចេកទេសរបស់គាត់ដើម្បីលួចទិន្នន័យឯកជនរបស់ជនជាតិអាមេរិកាំង និងបានកេងចំណេញពីចំណុចងាយរងគ្រោះនៃកំណត់ត្រាវេជ្ជសាស្ត្រ និងហិរញ្ញវត្ថុសម្រាប់ការចំណេញរបស់គាត់” ។
Wyatt បានមានប្រសាសន៍ថា គាត់គឺជាផ្នែកមួយរបស់ក្រុមដែលចាប់ផ្តើមនៅឆ្នាំ២០១៦ ហើយគាត់ទទួលខុសត្រូវក្នុងការចូលទៅកាន់បណ្តាញកុំព្យូទ័ររបស់ក្រុមហ៊ុនសហរដ្ឋអាមេរិកដោយគ្មានការអនុញ្ញាត។
លោកក៏បានសារភាពផងដែរថា លោកបានដើរតួនាទីក្នុងការបង្កើត ធ្វើឱ្យមានសុពលភាពនិងរក្សាទំនាក់ទំនងការទូទាត់ និងគណនីបណ្តាញឯកជននិម្មិត។ លោក Wyatt បានសុំទោសនៅក្នុងសវនាការដែលធ្វើឡើងតាមរយៈកម្មវិធី Zoom ដោយនិយាយថា គាត់កំពុងប្រើថ្នាំសម្រាប់ដោះស្រាយបញ្ហាផ្លូវចិត្តដែលនាំឱ្យគាត់ធ្វើការសម្រេចចិត្តមិនល្អ។
មេធាវីរបស់លោក Wyatt គឺលោក Brocca Morrison បានបញ្ជាក់ថាថា លោក Wyatt មិនបានរៀបចំការវាយលុក និងជាហេគឃ័រតែម្នាក់ដែលត្រូវបានគេស្គាល់អត្តសញ្ញាណ។
ប្រែសម្រួល៖ប៉ោក លក្ខិណា
ប្រភពព័ត៌មាន Gbhacker ចុះផ្សាយថ្ងៃទី២២ ខែកញ្ញា ឆ្នាំ២០២០