សមាជិកក្រុមហេគឃ័រជនជាតិរុស្ស៊ីម្នាក់ដែលហេគលើគេហទំព័រ LinkedIn, Dropbox និង Formspring នៅរយៈពេល០៨ឆ្នាំមុននៅទីបំផុតត្រូវតុលាការសហព័ន្ធនៅ San Francisco ផ្តន្ទាទោសឲ្យជាប់ពន្ធនាគាររយៈពេល៨៨ខែ(ច្រើនជាង៧ឆ្នាំ)លើទឹកដីសហរដ្ឋអាមេរិក។
លោក Yevgeniy Aleksandrovich Nikulin មានអាយុ ៣២ឆ្នាំមកពីទីក្រុងមូស្គូបានលួចចូលក្នុងម៉ាស៊ីនមេដែលជាកម្មសិទ្ធិរបស់ក្រុមហ៊ុនប្រព័ន្ធផ្សព្វផ្សាយសង្គមអាមេរិកចំនួន០៣រួមមានក្រុមហ៊ុន LinkedIn ក្រុមហ៊ុនDropbox និងក្រុមហ៊ុន Formspring ដែលជាក្រុមហ៊ុន
បណ្តាញសង្គមពុំមានដំណើរការ និងលួចទិន្នន័យរបស់អ្នកប្រើប្រាស់ច្រើនជាងចំនួន ២០០លាននាក់។
នៅចន្លោះខែមីនា និងខែកក្កដា ឆ្នាំ ២០១២ លោក Nikulin បានលួចចូលក្នុងកុំព្យូទ័ររបស់ ក្រុមហ៊ុន LinkedIn ក្រុមហ៊ុន Dropbox និងក្រុមហ៊ុន Formspring ហើយបានដំឡើងមេរោគនៅលើកម្មវិធីទាំងនោះ ដោយអាចអោយគាត់ទាញយកទិន្នន័យអ្នកប្រើប្រាស់ពីចំនួនច្រើនជាង១១៧លាននាក់ពីអ្នកប្រើប្រាស់កម្មវិធី LinkedIn និងកម្មវិធី Dropbox ច្រើនជាងចំនួន៦៨លាននាក់។
យោងតាមប្រភពព្រះរាជអាជ្ញា បញ្ជាក់ឲ្យដឹងថា លោក Nikulin ក៏បានធ្វើការជាមួយមនុស្សផ្សេងទៀត(មិនបញ្ចេញឈ្មោះ) នៅក្នុងវេទិកាស្តីពីឧក្រិដ្ឋកម្មតាមអ៊ីនធឺរណិត ដែលនិយាយជាភាសារុស្ស៊ីដើម្បីលក់ទិន្នន័យរបស់អតិថិជន ដែលគាត់លួចបាន។
ក្រៅពីការលួចចូលក្នុងបណ្តាញព័ត៌មានសង្គមទាំងបី លោក Nikulin ក៏ជាប់ចោទពីបទចូលប្រើអត្តសញ្ញាណប័ណ្ណរបស់និយោជិកក្រុមហ៊ុន LinkedIn និងក្រុមហ៊ុន Formspring ដែលជួយគាត់អនុវត្តការហេគកុំព្យូទ័របានសម្រេច។
នាយកដ្ឋានយុត្តិធម៌បាននិយាយថា “តុលាការក៏បានរកឃើញថាក្រុមហ៊ុន Automattic ដែលជាក្រុមហ៊ុនមេរបស់ WordPress.com គឺជាជនរងគ្រោះក្នុងការបំពានពីសំណាក់ជនជាប់ចោទ បើទោះបីជាពុំមានភ័ស្តុតាងណាមួយដែលថា ចុងចោទបានលួចយកអត្តសញ្ញាណរបស់អតិថិជនក៏ដោយ” ។
លោក Nikulin ត្រូវសមត្ថកិច្ចចាប់ខ្លួននៅទីក្រុង Prague នៅថ្ងៃទី៥ ខែតុលា ឆ្នាំ២០១៦ ដោយភ្នាក់ងារ Interpol ដែលធ្វើការសហការជាមួយ FBI ហើយលោកត្រូវធ្វើបត្យាប័នទៅសហរដ្ឋអាមេរិកនៅខែមីនា ឆ្នាំ២០១៨ ក្រោតពីមានជម្លោះលើបញ្ហាធ្វើបត្យាប័នជាយូរមកហើយរវាងសហរដ្ឋអាមេរិក និងប្រទេសរុស្ស៊ី។
នៅឆ្នាំ២០១៦ ក្រុមហេគឃ័រត្រូវគេចោទប្រកាន់ពីបទបង្កបទឧក្រិដ្ឋចំនួន០៩ករណី ដូចជាលួចចូលកុំព្យូទ័រ លួចអត្តសញ្ញាណ បង្កការខូចខាតដល់កុំព្យូទ័រ ចូលដំណើរការជួញដូរនៅក្នុងឧបករណ៍ដោយពុំមានការអនុញ្ញាត និងករណីផ្សំគំនិត។
ទោះបីជាយ៉ាងណាក៏ដោយ ក្រោយពីមានការពន្យារពេលនៃការសាកល្បងរយៈពេលយូរដោយសារតែមានការរីករាលដាលនៃជំងឺឆ្លងវីរុសកូរ៉ូណា គណៈកម្មាធិសហព័ន្ធនៃសហរដ្ឋអាមេរិករកឃើញថា លោក Nikulin មានកំហុសនៅដើមខែកក្កដាឆ្នាំនេះហើយត្រូវតុលាករកាត់ទោសឱ្យជាប់ពន្ធនាគាររយៈពេល ៨៨ខែនៅថ្ងៃទី២៩ ខែកញ្ញា។
លោក William H. Alsup ចៅក្រមនៅសហរដ្ឋអាមេរិកបានផ្តន្ទាទោស លោក Nikulin ពីបទលក់ឈ្មោះអ្នកប្រើប្រាស់ និងលេខសម្ងាត់ ដោយបានលួចដំឡើងមេរោគនៅលើកុំព្យូទ័រការពារ ករណីឃុបឃិត ការលួចចូលកុំព្យូទ័រ និងការលួចអត្តសញ្ញាណ។
មុនពេលបើកសវនាការកាត់ទោសនៅថ្ងៃទី២៩ ខែកញ្ញា រដ្ឋអាជ្ញាសហព័ន្ធបានស្វែងរកការកាត់ទោសឲ្យលោកជាប់ពន្ធនាគាររយៈពេល ១៤៥ខែដែលស្មើនឹងរយៈពេលច្រើនជាង ១២ឆ្នាំនៅក្នុងពន្ធនាគារ ការណែនាំដោះលែងរយៈពេល៣ឆ្នាំ និងត្រួតពិនិត្យឡើងវិញ។លោក Nikulin បានជាប់នៅក្នុងមន្ទីរឃុំឃាំងសហរដ្ឋអាមេរិកចាប់តាំងពីការធ្វើបត្យាប័នពីសាធារណរដ្ឋឆែក(Czech Republic) ហើយក៏ត្រូវជាប់ពន្ធនាគារភ្លាម។
ប្រែសម្រួល៖ប៉ោក លក្ខិណា
ប្រភពព័ត៌មាន thehackernews ចុះផ្សាយថ្ងៃទី០១ ខែតុលា ឆ្នាំ២០២០
