នៅថ្ងៃអង្គារ ទី១៣ ខែតុលា ថ្មីៗនេះ ប៉ូលិសមកពីអង្គភាពសកម្មភាពពិសេសសម្រាប់បង្ក្រាបបទឧក្រិដ្ឋបច្ចេកវិទ្យាព័ត៌មានរបស់ប្រទេសថៃបានចាប់ខ្លួនជនសង្ស័យចំនួនបួននាក់ពីបទបើកល្បែងស៊ីសងតាមអ៊ីនធឺរណិតនៅលើគេហទំព័រចំនួន០៩ហើយបានរឹបអូសយកទ្រព្យសម្បត្តិប្រមាណចំនួន៧៥លានបាត (២,៤ លានដុល្លារអាមេរិក)។
លោកឧត្តមសេនីយ៍ Suwat Jangyodsuk អគ្គស្នងការរងនៃការិយាល័យប៉ូលិសថៃថ្លែងនៅក្នុងសន្និសីទកាសែតនៅថ្ងៃអង្គារនេះថា ជនសង្ស័យទាំង០៤នាក់ត្រូវសមត្ថកិច្ចចាប់ខ្លួនក្រោមដីការបស់តុលាការព្រហ្មទណ្ឌចុះថ្ងៃទី០៩ ខែតុលា និងជាប់ចោទពីបទបោកបញ្ឆោតមនុស្សតាមរយៈការផ្សាយពាណិជ្ជកម្មទំនាក់ទំនងផ្ទាល់ ឬដោយប្រយោលដើម្បីលេងល្បែងតាមអ៊ីនធឺរណិត និងលាងលុយកខ្វក់។
ជនសង្ស័យទាំង០៤នាក់មានលោក Taentai Narongkul ជាអ្នកដឹកនាំ និងចំនួន០៣នាក់ផ្សេងទៀតជាសាច់ញាតិរបស់លោក និងជាមិត្តជិតស្និទ្ធ។
លោក Suwat មានប្រសាសន៍ថា ទ្រព្យសម្បត្តិដែលរឹបអូសបានរួមមានសាច់ប្រាក់ចំនួន០១ លានបាត រថយន្តទំនើបចំនួន១១គ្រឿង នាឡិកា គ្រឿងតុបតែងលម្អ សៀវភៅប្រាក់បញ្ញើធនាគារ៥០ក្បាល គ្រឿងកុំព្យូទ័រ២៦ឈុត ទូរស័ព្ទដៃចំនួន១០៨គ្រឿង និងកាំភ្លើងខ្លីចំនួន០២ដើម។
លោក Suwat បន្ថែមផងដែរថា ទឹកប្រាក់សរុបចំនួន ១៥ពាន់លានបាតកំពុងចរាចរនៅក្នុងរយៈពេល០៦ខែចុងក្រោយនេះ។ ប៉ូលិសថៃតែម្នាក់មិនអាចបិទគេហទំព័រខុសច្បាប់ទាំងអស់នោះបានទេ ហើយប៉ូលិសត្រូវស្វែងរកជំនួយពីភ្នាក់ងារផ្សេងទៀតដោយសារតែម៉ាស៊ីនបម្រើសេវាកម្មហ្គេមមាននៅក្រៅប្រទេសថៃ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៣ ខែតុលា ឆ្នាំ២០២០
