Juspay ដែលជាសេវាកម្មសម្រាប់អ្នកជំនួញជាច្រើននៅលើអនឡាញដូចជានៅលើវេទិការបស់Amazon និង Swiggy បានទទួលរងនូវការបែកធ្លាយទិន្នន័យទ្រង់ទ្រាយធំ ហើយពេលនេះ ទិន្នន័យរបស់អ្នកប្រើប្រាស់ជាច្រើនក៏ត្រូវបានដាក់លក់នៅលើគេហទំព័រងងឹតផងដែរ។ លោក Rajshekhar Rajaharia ដែលជាអ្នកស្រាវជ្រាវឯករាជ្យម្នាក់រកឃើញនូវឧប្បត្តិវហេតុនេះនៅពេលដែលទិន្នន័យ Database នេះត្រូវបានដាក់លក់នៅលើគេហទំព័រងងឹត និងចែកចាយតាម Telegram នោះ។
Juspay សារភាពថា ខ្លួនមានប្រតិបត្តិការជិត 650K ក្នុងមួយថ្ងៃ ហើយខ្លួនមានសម្ព័ន្ធមិត្តជាមួយនឹងក្រុមហ៊ុនបច្ចេកវិទ្យាយក្សធំៗដូចជា Amazon, Swiggy, BookMyShow, MakeMyTrip, Snapdeal, Freecharge និង Yatra ផងដែរ។ ទិន្នន័យរបស់ក្រុមហ៊ុននេះត្រូវទទួលរងនូវការរំលោភបំពាននៅក្នុងខែសីហា ឆ្នាំ ២០២០ មកម្ល៉េះ។
ព័ត៌មានសំខាន់ៗជាច្រើនរបស់ម្ចាស់បណ្ណនេះគឹមានលេខ៤ ខ្ទង់នៃកាតឥណទាន ឈ្មោះធនាគារ ថ្ងៃផុតកំណត់ និងឆ្នាំដែលមានការចែកចាយនៅលើគេហទំព័រងងឹតនេះ។ Juspay បញ្ជាក់ថា មិនទាន់មានព័ត៌មានពេញលេញនៃលេខកាតរបស់អ្នកប្រើប្រាស់ ឬព័ត៌មានធនាគារពេញលេញដែលបែកធ្លាយនៅឡើយទេ។ ក្រុមហ៊ុន Juspay អះអាងថា ក្រុមហ៊ុនមិនមានរក្សាទុកនូវព័ត៌មានសំខាន់ៗដូចជា PINs, Passwords ឬ CVV នោះទេ ដូចនេះទិន្នន័យទាំងនេះគឺមិនមានការបែកធ្លាយនោះទេ៕
សម្រួល៖ សុផា
