នៅថ្ងៃអង្គារ ទី១២ ក្រុមការងារកម្មវិធី Google News Initiative បានប្រកាសផ្តល់មូលនិធិជាសកលដើម្បីប្រយុទ្ធប្រឆាំងនឹងព័ត៌មានមិនត្រឹមត្រូវអំពីវ៉ាក់សាំងការពារជំងឺកូវីត ១៩ ដែលមានតម្លៃដល់ទៅ៣លានដុល្លារអាមេរិក។
កម្មវិធី Google News Initiative របស់ក្រុមហ៊ុន Google សំដៅដល់ មូលនិធិប្រឆាំងព័ត៌មានមិនពិតទាក់ទងនឹងជំងឺកូវីត១៩ មានគោលបំណងគាំទ្រដល់កិច្ចខិតខំប្រឹងប្រែងរបស់អ្នកសារព័ត៌មានក្នុងការត្រួតពិនិត្យព័ត៌មានមិនពិតលើដំណើរការចាក់វ៉ាក់សាំង។
មូលនិធិនេះនឹងទទួលយកគម្រោងនានា ដែលបង្កើតឡើងដើម្បីត្រួតពិនិត្យការពិត សម្រាប់អ្នកទស្សនា ជាពិសេសចំពោះក្រុមដែលរងផលប៉ះពាល់ពីព័ត៌មានមិនពិត។
ក្រុមអ្នកច្បាប់ចំនួន១៤នាក់មកពីផ្នែកអប់រំ ប្រព័ន្ធផ្សព្វផ្សាយ ផ្នែកវេជ្ជសាស្រ្ត និងអង្គភាពមិនរកប្រាក់ចំណេញ រួមទាំងអ្នកតំណាងមកពីអង្គការសុខភាពពិភពលោកនឹងធ្វើការ ពិនិត្យឡើងវិញលើពាក្យស្នើ(Applications)ទាំងនោះ។
នៅខែធ្នូ កម្មវិធី Google News Initiative របស់ក្រុមហ៊ុន Google ធ្លាប់ប្រកាសផ្តល់ប្រាក់ មូលនិធិចំនួន១,៥លានដុល្លារដល់មជ្ឈមណ្ឌលប្រព័ន្ធផ្សព្វផ្សាយវ៉ាក់សាំងការពារជំងឺកូវីត ១៩ ដើម្បីគាំទ្រដល់ការស្រាវជ្រាវពិត៕
