ក្រុមហ៊ុន Facebook Inc និងក្រុមហ៊ុន Facebook Ireland ដាក់ពាក្យបណ្តឹងតាមផ្លូវច្បាប់នៅក្នុងប្រទេសព័រទុយហ្កាល់ដើម្បីប្រឆាំងនឹងមនុស្សចំនួនពីរនាក់ពីបទលួចយកទិន្នន័យរបស់អ្នកប្រើប្រាស់ និងទិន្នន័យផ្សេងទៀតពីគេហទំព័រ Facebook ដែលបានបំពានលើល័ក្ខខ័ណ្ឌរបស់សេវាកម្ម និងច្បាប់ការពារទិន្នន័យក្នុងប្រទេស ព័រទុយហ្កាល់។
ផ្នែកបន្ថែម Chrome ដែលមានគំនិតអាក្រក់កំណត់គោលដៅអ្នកប្រើប្រាស់បណ្តាញសង្គម (Extensions)
ក្រុមជនជាប់ចោទបង្កើតផ្នែកបន្ថែម (browser extensions) និងដាក់ផ្នែកបន្ថែមទាំងនោះលើហាង Chrome ដោយប្រើឈ្មោះអាជីវកម្ម“ Oink និង Stuff” ដែលជាក្រុមហ៊ុនជំនាញក្នុងការបង្កើតកម្មវិធី Android និង browser extensions សម្រាប់ Chrome, Firefox, Opera និង Microsoft Edge ។ ខណៈដែលមានក្រុមហ៊ុនអភិវឌ្ឍ browser extensions ជាច្រើន ក្រុមហ៊ុន Facebook បាននិយាយថា មានផ្នែកបន្ថែមចំនួន ៤ គឺ Web for Instagram plus DM, Blue Messenger, Emoji keyboard, and Green Messenger ជាផ្នែកបន្ថែមមានមេរោគនិងបង្កប់កូដកុំព្យួទ័រដែលលាក់មុខងារមិនល្អដូចជា spyware ។
Scraping គឺជាទម្រង់នៃការប្រមូលទិន្នន័យ ដែលពឹងផ្អែកលើស្វ័យប្រវត្តិកម្មដែលពុំមានការអនុញ្ញាតដើម្បីទាញយកទិន្នន័យពីគេហទំព័រឬកម្មវិធី។
ក្រុមហ៊ុន Facebook បញ្ជាក់ថា នៅពេលអ្នកប្រើប្រាស់ដំឡើងផ្នែកបន្ថែមទាំងនេះ(extensions) នៅលើកម្មវិធីរុករក (browsers) របស់ពួកគេនោះ អ្នកប្រើប្រាស់ក៏កំពុងតែដំឡើងលេខកូដសម្ងាត់ដែលរចនាឡើងដើម្បីប្រមូលយកព័ត៌មានរបស់អ្នកប្រើប្រាស់ពីគេហទំព័រ Facebook ប៉ុន្តែក៏មានព័ត៌មានពីកម្មវិធីរុករកផ្សេងៗទៀតរបស់អ្នកប្រើប្រាស់ដែលមិនមានជាប់ទាក់ទងនឹង Facebook ផងដែរ។ នៅពេលដែលចូលមើលគេហទំព័រ Facebook នោះ នឹងមាន browser extensions ដើម្បីប្រមូលឈ្មោះអ្នកប្រើប្រាស់ លេខសម្គាល់អ្នកប្រើប្រាស់ ភេទ ស្ថានភាព ទំនាក់ទំនងក្រុម អាយុ និងព័ត៌មានផ្សេងៗទៀត ដែលមានជាប់ទាក់ទងនឹងគណនីរបស់អ្នកប្រើប្រាស់។
គួររំលឹកផងដែរថា ចាប់តាំងពីដើមឆ្នាំ២០១៩ អ្នកកាន់ការងារផ្នែកច្បាប់របស់ Facebook បានដាក់ពាក្យបណ្តឹងប្រឆាំងនឹងភាគីទីបី(third-parties)ជាច្រើនដែលបានបំពានលើវេទិការបស់ខ្លួន។ ស្រដៀងគ្នានេះដែរ នាពេលបច្ចុប្បន្ន Facebook បានស្នើឱ្យចៅក្រមព័រទុយហ្កាល់ចេញសេចក្តីសម្រេចជាអចិន្ត្រៃយ៍ប្រឆាំងនឹងក្រុម Oink និង Stuff team ហើយឱ្យក្រុមហ៊ុននោះលុបចោលទិន្នន័យអ្នកប្រើប្រាស់ Facebook ទាំងអស់ដែលក្រុម Oink និង Stuff team ទាញយកបានតាមរយៈផ្នែកបន្ថែម (extensions)ទាំងបួននោះ។
បញ្ជាក់៖ ជនជាប់ចោទមិនបានសម្របសម្រួលលើប្រព័ន្ធសុវត្ថិភាពរបស់ Facebook ទេ។ ប៉ុន្តែផ្ទុយទៅវិញពួកគេប្រើប្រាស់ផ្នែកបន្ថែម(extensions)នៅលើឧបករណ៍របស់អ្នកប្រើប្រាស់ដើម្បីប្រមូលព័ត៌មានទាំងនោះ៕
ប្រែសម្រួល៖ប៉ោក លក្ខិណា
