ក្រុមហ៊ុន Tesla Inc ជាក្រុមហ៊ុនផលិតរថយន្តអគ្គិសនីអាមេរិកដែលមានមូលដ្ឋាននៅ តំបន់ Palo Alto រដ្ឋកាលីហ្វ័រញ៉ាបានប្តឹងអតីតបុគ្គលិក និងវិស្វករកម្មវិធីម្នាក់ដែលមានឈ្មោះថា Alex Khatilov ពីបទលួចទិន្ន័យពាណិជ្ជកម្ម និងបំពានកិច្ចសន្យាក្នុងរយៈពេលសប្តាហ៍ដំបូងនៃការបម្រើការនៅក្រុមហ៊ុននេះ។
ក្រុមហ៊ុនចោទប្រកាន់លោក Khatilov ពីការលួចលេខកូដ និងឯកសារពី WARP Drive ដែលជាប្រព័ន្ធកម្មវិធីផ្នែកខាងក្រោយ។ ក្រុមហ៊ុន Tesla បង្កើតប្រព័ន្ធនោះឡើងដើម្បីអាចផ្តល់ស្វ័យប្រវត្តិកម្មនូវដំណើរការអាជីវកម្មជាច្រើនដែលពាក់ព័ន្ធនឹងការផលិតនិងលក់រថយន្តរបស់ខ្លួន។ របាយការណ៍របស់ CNBC រាយការណ៍ថា ក្រុមហ៊ុនក៏បានចោទប្រកាន់គាត់ពីបទលុបភស្តុតាងនៅពេលក្រុមសន្តិសុខបានទៅជួបជនជាប់ចោទ។ ជនជាប់ចោទត្រូវក្រុមហ៊ុនជួលមកដើម្បីឲ្យជួយដល់ក្រុមការធានាគុណភាពរបស់ក្រុមហ៊ុន Tesla ក្នុងការបង្កើតកម្មវិធីដែលអាចផ្តល់ស្វ័យប្រវត្តិកម្មដល់ការងារ ឬដំណើរការអាជីវកម្មដែលទាក់ទងទៅនឹងបរិស្ថានសុខភាព និងសុវត្ថិភាព។
គួររំលឹកផងដែរថា ជនជាប់ចោទចាប់ផ្តើមធ្វើការឱ្យក្រុមហ៊ុន Tesla នៅថ្ងៃទី២៨ ខែធ្នូឆ្នាំ២០២០ ហើយភ្លាមៗនោះគាត់ចាប់ផ្តើមផ្ទុក(Upload)ឯកសារ និងស្គ្រីប (សរសេរជាភាសាសរសេរកម្មវិធីដែលមានឈ្មោះថា Python) ទៅក្នុងគណនី Dropbox របស់គាត់។ ក្រុមហ៊ុន Tesla ចាប់បានសកម្មភាពលួចរបស់គាត់នៅថ្ងៃទី6 ខែមករា។
នៅទីបំផុត លោក Khatilov ប្រាប់កាសែត New York Post នៅថ្ងៃសុក្រថា ឯកសារកម្មិធីបញ្ចូលទៅ Dropbox របស់លោកដោយអចេតនា(កំហុសបច្ចេកទេស)។ គាត់បានព្យាយាមធ្វើថតចម្លង(backup copy) ឯកសារទុកនៅលើកុំព្យូទ័ររបស់គាត់ ហើយគាត់ បានផ្លាស់ប្តូរវាទៅ Dropbox ដោយអចេតនា។ លោកមិនបានដឹងទេថា ក្រុមហ៊ុន Tesla កំពុងប្តឹងរូនលោក រហូតទាល់ខាងកាសែតទាក់ទងទៅ ទើបគាត់ដឹងពីបញ្ហានេះ៕
ប្រភពព័ត៌មាន gbhackers ចុះផ្សាយថ្ងៃទី២៥ ខែមករា ឆ្នាំ២០២១
ប្រែសម្រួល៖ប៉ោក លក្ខិណា
