ពេលនេះ កម្មវិធីកម្សាន្ត TikTok នៅក្នុងប្រទេសចិននាំយកនូវមុខងារ “teenage mode” ដែលនឹងកំណត់នូវពេលវេលាសម្រាប់ក្មេងក្រោមអាយុ 14 ឆ្នាំអោយចំណាយលេងកម្មវិធីនេះត្រឹមតែ 40 នាទីក្នុងមួយថ្ងៃប៉ុណ្ណោះ។ក្រុមហ៊ុន ByteDance ប្រកាសថា វិធានការណ៍នេះនឹងអនុវត្តចំពោះកម្មវិធី Douyin (កម្មវិធីស្រងៀង TikTok) សម្រាប់ក្មេងដែលមានអាយុក្រោម 14 ឆ្នាំដែលបានចុះឈ្មោះជាមួយនឹងឈ្មោះពិតរបស់ពួកគេ។
ក្មេងៗក៏មិនអាចប្រើប្រាស់កម្មវិធី Douyin នេះបានដែរចាប់ពីម៉ោង 10 យប់ដល់ម៉ោង 6 ព្រឹក។ ក្រុមហ៊ុន ByteDance ក៏ជម្រុញអោយឪពុកម្តាយជួយកូនៗក្នុងការចុះឈ្មោះពិត ឬជួយចុចបើកដំណើរការមុខងារ “teenage mode” ។ ក្រុមហ៊ុន ByteDance នៅមិនទាន់បញ្ជាក់អំពីការអនុវត្តវិធានការសម្រាប់ក្មេងដែលមិនប្រើប្រាស់ឈ្មោះពិតនៅឡើយទេ។
បន្ថែមពីនេះទៀតនោះ កម្មវិធីនេះនឹងនាំយកនូវមាតិកាថ្មីចាប់ពីផ្នែកវិទ្យាសាស្រ្ត សារៈមន្ទីរ ការតាំងពិពណ៌សិល្បៈ និងទេសភាពធម្មជាតិដើម្បីបំផុសគំនិតក្មេងៗផងដែរ។ ការដាក់កំហិតក្នុងការប្រើប្រាស់នូវកម្មវិធី TikTok និង Douyin នេះគឺជាវិធានការបន្ទាន់មួយរបស់ក្រុមហ៊ុនByteDance ដើម្បីឈានទៅដល់បទបញ្ជាដ៏មានសក្តានុពលនាពេលខាងមុខ។ គួរបញ្ជាក់ផងដែរថា ការសម្រេចចិត្តនេះអាចនឹងជម្រុញអោយវេទិកាអ៊ីនធឺរណិតផ្សេងទៀតដែលមានមាតិកាវីដេអូកម្សាន្តខ្លីៗអាចដាក់នូវការកំហិតណាមួយស្រដៀងគ្នានេះផងដែរ៕
