ក្រោយពីបញ្ចប់កម្មវិធីប្រកាសអំពីការផ្ដល់ជំនួយដល់កសិករចំនួន ១៦ ពាន់លានដុល្លារ ដែលរងផលប៉ះពាល់ដោយសារសង្គ្រាមពាណិជ្ជកម្មរវាងអាមេរិក និងចិន លោក ដូណាល់ ត្រាំ បានឆ្លើយតបនឹងសំនួរក្ដៅគគុកដែលចោទសួរទាក់ទងនឹង Huawei។
នៅពេលដែលអ្នកកាសែតបានចោទសួរប្រធានាធិបតីអាមេរិក អំពីការដាក់ Huawei ចូលទៅក្នុងបញ្ជីខ្មៅ មានការឆ្លើយតបបែបនេះថា ៖
“Huawei គឺជាអ្វីម្យ៉ាងដែលគ្រោះថ្នាក់បំផុត។ មើលពីជ្រុងនៃផ្នែកសន្តិសុខ និងជ្រុងនៃផ្នែកយោធាអំពីអ្វីដែលពួកគេ (Huawei) បានធ្វើ វាពិតជាគ្រោះថ្នាក់ណាស់។ ដូចនេះអាចទៅរួចដែល Huawei អាចត្រូវដាក់បញ្ចូលក្នុងកិច្ចព្រមព្រៀងពាណិជ្ជកម្ម។ ប្រសិនបើយើងធ្វើកិច្ចព្រមព្រៀង ខ្ញុំស្រមៃថា Huawei អាចនឹងត្រូវបញ្ចូលក្នុងទម្រង់ខ្លះ ផ្នែកខ្លះនៃកិច្ចព្រមព្រៀង”។
មានពីចំណុចដែលលោក ត្រាំ បានបញ្ជាក់ច្បាស់ក្នុងការឆ្លើយតបរបស់ខ្លួន។ ទីមួយការដាក់ Huawei ក្នុងបញ្ជីខ្មៅ ដោយសារក្រុមហ៊ុននេះជាការគំរាមកំហែងដល់សន្តិសុខជាតិ និងទីពីរអាចប្រើជាផ្នែកមួយនៃកិច្ចព្រមព្រៀងពាណិជ្ជកម្ម។
វាអាចជាដំណឹងល្អមួយសម្រាប់ Huawei ព្រោះថាបើប្រទេសមហាអំណាចទាំងពីរព្រមព្រៀងគ្នាលើកិច្ចព្រមព្រៀងពាណិជ្ជកម្មថ្មីមួយ Huawei អាចនឹងត្រូវដកចេញពីបញ្ជីខ្មៅ៕
