កុំព្យូទ័រយួរដៃម៉ាក Samsung មួយម៉ូដែល ត្រូវបានវិចិត្រករអ៊ីនធឺណិត Guo O Dong បញ្ចូលនូវមេរោគសាហាវៗចំនួន ៦ ដែលគេបានឲ្យឈ្មោះកុំព្យូទ័រនេះថា “The Persistence of Choas”។
មេរោគចំនួន ៦ ដែលបានជ្រើសរើសបញ្ចូលក្នុងកុំព្យូទ័រអេក្រង់ទំហំ ១០,២ អ៊ីញនេះ គឺរើសដាក់ដោយផ្អែកលើទឹកលុយដែលពួកវាបានបំផ្លាញ។ តួយ៉ាងគេបានបញ្ចូលនូវមេរោគ WannaCry ដែលបានផ្ទុះឡើងនៅឆ្នាំ ២០១៧ ធ្វើឲ្យខាតបង់ទឹកប្រាក់សរុបជិត ៤ ពាន់លានដុល្លារ។
មេរោគដទៃទៀតមានដូចជា ៖
- មេរោគ ILOVEYOU ដែលផ្ទុះចេញនៅឆ្នាំ ២០០០ ធ្វើឲ្យខាតបង់ ៥,៥ ពាន់លានដុល្លារ
- មេរោគ MyDoom ចេញនៅឆ្នាំ ២០០៤ ធ្វើឲ្យខាតបង់ទឹកប្រាក់ ៣៨ ពាន់លានដុល្លារ
- មេរោគ SoBig ចេញនៅឆ្នាំ ២០០៣ ធ្វើឲ្យខាតបង់ទឹកប្រាក់ ៣៧ ពាន់លានដុល្លារ
- មេរោគ DarkTequila ចេញឆ្នាំ ២០១៨ ធ្វើឲ្យខាតបង់រាប់លានដុល្លារ
- មេរោគ BlackEnergy ចេញនៅឆ្នាំ ២០១៥ បានកាត់ផ្ដាច់អគ្គិសនីក្នុងទំហំធំនៅប្រទេសអ៊ុយក្រែន
គួរដឹងថាកុំព្យូទ័រមួយគ្រឿងនេះត្រូវបានដាក់លក់ដេញថ្លៃនៅលើអនឡាញ ដែលបច្ចុប្បន្ននេះអាចដេញថ្លៃបានតម្លៃ ១,២ លានដុល្លារឯណោះ៕
