បើតាមសារព័ត៌មាន Southern China Morning និង Daily Economic News បានឲ្យដឹងថាបុគ្គលិកសរសេរកម្មវិធីឲ្យធនាគារម្នាក់ ដែលមិនពេញចិត្តនឹងធនាគារដែលខ្លួនធ្វើការនោះ បានព្យាយាមរកចន្លោះប្រហោងរបស់ក្រុមហ៊ុនខ្លួនរហូតបានសម្រេច ដែលអាចធ្វើឲ្យខ្លួនអាចដកលុយតាម ATM ធនាគាររបស់ខ្លួនដែលមានឈ្មោះថា Huaxia បានដល់ទៅជាង ៧ លានយាន់ (ជាង ១ លានដុល្លារអាមេរិក) ដោយគ្មាននរណាដឹងតាមរយៈ Loopholes។
វិធីដែលអាចធ្វើឲ្យលោក Qin Qisheng ធ្វើរឿងនេះបាន គឺដោយសារតែប្រព័ន្ធកត់ត្រារបស់ធនាគារ Huaxia មិនបានកត់ត្រាត្រឹមត្រូវរាល់ការធ្វើប្រតិបត្តិការដកលុយពេលកណ្ដាលអធ្រាត្រឡើយ ដែលធ្វើឲ្យពេលអតិថិជនដកលុយបានហើយ ខាងធនាគារក៏មិនបានកាត់លុយពីគណនីរបស់អតិថិជនដែរ។
ទោះបីជាមិនបានកាត់លុយអតិថិជនក៏ដោយចុះ ប៉ុន្តែប្រព័ន្ធធនាគារនោះ នឹងផ្ដល់សារពីភាពមិនប្រក្រតីនៃប្រតិបត្តិការទឹកប្រាក់ទៅខាងធនាគារវិញ ហើយអតិថិជនក៏ដកលុយលែងបានទៀតដែរ ប៉ុន្តែលោក Qin Qisheng បានបញ្ចូលកូដទៅក្នុងប្រព័ន្ធធនាគារ ដើម្បីកុំឲ្យសារលោតចេញមក និងនៅតែដកលុយបានទៀត។
ដោយសារតែលុយដែលដកបានពីគណនីខ្លួនមិនត្រូវបានធនាគារកាត់នោះហើយ ទើបធ្វើឲ្យលោក Qin Qisheng អាចដកលុយបានជាង ១ លានដុល្លារចាប់ពីខែវិច្ឆិកា ឆ្នាំ ២០១៦ រហូតដល់ខែមករា ឆ្នាំ ២០១៨ ទើបគេចាប់បាន ដោយមានប្រតិបត្តិការដកលុយជាង ១ ៣៥៨ ដង។
ទោះបីជាលួចលុយធនាគារយ៉ាងនេះក៏ដោយ ក៏ខាងធនាគារនាពេលនេះចង់ដកពាក្យបណ្ដឹងវិញ ដោយសារខ្លួនស្ដាប់ការបកស្រាយរបស់លោក Qin Qisheng ថា លោកធ្វើនេះ ដើម្បីចង់តេស្តសាកល្បងប្រព័ន្ធសុវត្ថិភាពធនាគារ ហើយក៏មិនបានយកលុយនោះទៅចាយវាយដែរ ដោយលោកបានដាក់វានៅក្នុងគណនីដាច់ដោយឡែកមួយ គឺគណនីសម្រាប់លុយដែលលោកលួចបាន។ ម៉្យាងទៀត ខាងធនាគារក៏មិនចង់បាត់បង់កេរ្តិ៍ឈ្មោះដោយសាររឿងអាស្រូវនេះដែរ។
យ៉ាងណាមិញ ខាងតុលាការមិនព្រមលើកលែងទោសតាមការដកពាក្យបណ្ដឹងនោះទេ ពោលគឺលោក Qin Qisheng អាចប្រឈមមុខនឹងការជាប់គុករយៈពេល ១០ ឆ្នាំកន្លះ បើសិនជាការប្ដឹងឧទ្ធរណ៍របស់លោកមិនបានសម្រេច៕
![](https://i0.wp.com/cdn.nctc.gov.kh/2019/06/5c5a51d55567d_1549423020_large.jpg?resize=600%2C425&ssl=1)