ជិត ៥០ឆ្នាំក្រោយបេសកកម្ម Apollo ទៅកាន់ឋានព្រះចន្ទ អាមេរិកកំពុងត្រៀមបេកសកកម្មថ្មីមួយទៀតឈ្មោះ Artemis ទៅកាន់ឋានព្រះចន្ទនៅឆ្នាំ ២០២៤។ ព័ត៌មានមួយនេះត្រូវបានបញ្ជាក់ដោយនាយកទីភ្នាកងារអវកាសអាមេរិកាំងណាហ្សាលោក Jim bridenstine នាឱកាសដែលលោកបានទៅចូលរួមនៅក្នុងពិព័ណ៌យន្តហោះក្នុងប្រទេសបារាំង។ ក្រៅពីអាមេរិក ប្រទេសរុស្ស៊ី និងចិនក៏ចង់បញ្ជូនអវកាសយានិករបស់ខ្លួនទៅកាន់ឋានព្រះចន្ទដែរ តែមកទល់ពេលនេះ ប្រទេសនីមួយៗបានធ្វើការងារមួយនេះរៀងៗខ្លួន និងមានកាលវិភាគខុសគ្នា។ ខណៈពេលដែលអាមេរិកគ្រោងបញ្ជូននៅឆ្នាំ ២០២៤ ចិនគ្រោងបញ្ជូនពីពេលនេះទៅ ១០ឆ្នាំខាងមុខ ហើយរុស្ស៊ីក្នុងរង្វង់ទសវត្សឆ្នាំ ២០៣០ ឬ ២០៣១។
បន្ទាប់ពីបេសកកម្ម Apollo ទៅកាន់ឋានព្រះចន្ទប្រកបដោយជោគជ័យជាប្រវតិ្តសាស្រ្តក្នុងលោកកាលពីជិត ៥០ឆ្នាំមុនមក អាមេរិកកំពុងរៀបចំបេសកកម្មថ្មីមួយទៀតសម្រាប់ឆ្នាំ ២០២៤ ក្រោមឈ្មោះថា Artemis។ តែ ៥ឆ្នាំមុននឹងបេសកម្ម Artemis ចាប់ផ្តើម នៅមានកិច្ចការជាច្រើនដែលត្រូវធ្វើ ពិសេសការផលិតយានសម្រាប់ចុះចតលើដីព្រះចន្ទ។ នៅត្រង់ចំណុចនេះ នាយកទីភ្នាក់ងារអវកាសអាមេរិកណាហ្សាលោក Jim Bridenstine បានយល់ឃើញយ៉ាងដូច្នេះថា « កូនយានសម្រាប់ចុះចតលើដីព្រះចន្ទ… នេះគឺជាអ្វីដែលយើងចាំបាច់ត្រូវផលិតឲ្យបាន នៅក្នុងរយៈពេល ៥ឆ្នាំខាងមុខ ដើម្បីអាចបញ្ជូនមនុស្សទៅចុះចតលើដីព្រះចន្ទ ហើយបញ្ហាដែលអាចចោទ គឺបញ្ហានយោបាយ។ កាលណាយើងចំណាយពេលកាន់តែយូរ ដើម្បីធ្វើគម្រោងនេះ រដ្ឋាភិបាលអាចមានការផ្លាស់ប្តូរ ហើយរដ្ឋាភិបាលថ្មីអាចនឹងបង្វែរអាទិភាពទៅរឿងផ្សេង។ ដូច្នេះ តើធ្វើដូចម្តេចដើម្បីកាត់បន្ថយហានិភ័យនយោបាយនេះ? គឺយើងចាំបាច់ត្រូវតែធ្វើឲ្យបានលឿន »។
លោក Jim Bridenstine ចង់ធ្វើឲ្យបានលឿន ព្រោះក្រៅពីអាមេរិក ចិន និងរុស្ស៊ីក៏ចង់បញ្ជូនអវកាសយានិករបស់ខ្លួនទៅកាន់ឋានព្រះចន្ទដែរ។ តែរហូតមកទល់ពេលនេះ ប្រទេសនីមួយៗបានធ្វើការងារមួយនេះរៀងៗខ្លួនដោយនៅមិនទាន់មានការរួមសហការណ៍ជាលក្ខណៈអន្តរជាតិនៅឡើយទេ។ តែអ្វីជាការកត់សម្គាល់ និងជាលើកទី១ ថ្នាក់ដឹកនាំទីភ្នាក់ងារអវកាសអាមេរិក ចិន និងរុស្ស៊ីបានអង្គុយជជែករួមគ្នានាឱកាសចូលរួមពិព័ណ៌យន្តហោះដែលកំពុងរៀបចំក្នុងប្រទេសបារាំង។ ការចូលរួមជជែកគ្នាជាលក្ខណៈត្រីភាគីមួយនេះជាគំនិតផ្តួចផ្តើមរបស់លោក Jean Yves le Gall នាយកមជ្ឈមណ្ឌលជាតិនៃការសិក្សាអវកាសបារាំង។
គោលដៅរបស់លោក Jean Yves le Gall គឺព្យាយាមប្រមូលភាគីទាំង ៣ ឲ្យរួមសហការណ៍គ្នាជាជាងធ្វើការដាច់ដោយឡែកពីគ្នាស្តីពីបេសកកម្មទៅកាន់ឋានព្រះចន្ទ។ គេនៅមិនទាន់ដឹងថា តើអាមេរិក ចិន និងរុស្ស៊ីយល់ព្រមសហការណ៍គ្នាឬអត់ទេ អ្វីដែលគេដឹង ប្រទេសទាំង ៣ មានកាលវិភាគខុសគ្នាសម្រាប់ជាន់ដីព្រះចន្ទ អាមេរិកនៅឆ្នាំ ២០២៤ ចិនពីពេលនេះទៅ ១០ឆ្នាំខាងមុខ ហើយរុស្ស៊ីនៅក្នុងរង្វង់ទសវត្សឆ្នាំ ២០៣០ ឬ ២០៣១៕
![](https://i0.wp.com/cdn.nctc.gov.kh/2019/06/2019-06-17t084352z_1900066454_rc110753ab00_rtrmadp_3_france-airshow.jpg?resize=696%2C393&ssl=1)