កម្មវិធី VLC ជាកម្មវិធីចាក់វីដេអូដ៏ពេញនិយមបំផុត ដោយសារតែវាជាប្រភេទកូដចំហរ និង អាចប្រើប្រាស់បានដោយឥតគិតលុយ។ មិនត្រឹមតែមិនគិតលុយនោះទេ វាគឺអាចប្រើបានស្ទើតែគ្រប់ប្រព័ន្ធដំណើរការមិនថា Windows, macOS, Linux…។ តែថ្មីនេះវាមានកំហុសមួយដែលធ្វើឲ្យអ្នកប្រើប្រាស់កម្មវិធីរងផលប៉ះពាល់យ៉ាងធ្ងន់ធ្ងរ។
យោងតាមរបាយការណ៍របស់ភ្ងាក់ងារសុវត្ថិភាពរបស់អាល្លឺម៉ង់ (CERT-Bund) បានឲ្យដឹងថា មានកំហុសផ្នែកសុវត្ថិភាពយ៉ាងធ្ងន់ធ្ងរនៅលើកម្មវិធី VLC Player (លេខកូដកំហុស CVE-2019-13615 កម្រិសនៃគ្រោះថ្នាក់ 9,8 – ធ្ងន់ធ្ងរ)។ ផលប៉ះពាល់នោះគឺដោយសារតែ hacker អាចនឹងប្រើប្រាស់វិធីតម្លើងកម្មវិធីពីចម្ងាយ (RCE – remote code execution) ដែលអាចតម្លើង លុប និងដំណើរកម្មវិធីណាមួយគ្រប់បែបយ៉ាងតាមអំពើចិត្ត ដោយមិនបាច់សុំសិទ្ធពីម្ចាស់ម៉ាស៊ីននោះឡើយ។ និយាយឲ្យខ្លីគឺ VLC Player អាចឲ្យគេមើលឃើញ និងទាញយកទិន្ន័យគ្រប់យ៉ាងក្នុងម៉ាស៊ីនកុំព្យូទ័ររបស់អ្នកបានទាំងស្រុង។
បច្ចុប្បន្ននេះផលប៉ះពាល់គឺមាននៅលើ Windows, Linux, និង Unix តែមិនទាន់មានរបាយការណ៍ពី macOS នោះទេ។
ចំពោះវិធានការនោះ គឺលោកអ្នកអាចនឹងលុបកម្មវិធិចោលសិន រង់ចាំកំណែថ្មី ដោយប្រើប្រាស់កម្មវិធីជំនួសផ្សេងៗដូចជា KMPlayer ឬ Media Player Classic។
