Facebook បានដាក់ផែនការណ៍ជុំវិញការដាក់សម្ពាធដល់រាល់មាតិកាចែកចាយដែលពាក់ព័ន្ធនឹងផលិតផលមានផ្ទុកសារធាតុអាកុលនិងប្រភេទថ្នាំជក់រួមបញ្ចូលទាំងបារីអេឡិចត្រូនិកលើបណ្តាញសង្គមរបស់ខ្លួន។
តាមសារព័ត៌មាន CNN បានឲ្យដឹងថាគោលការណ៍ថ្មីដែលបានប្រកាសចូលជាធរមានកាលពីថ្ងៃពុធនឹងធ្វើការហាមឃាត់រាល់ការជួញដូរ ចែកចាយរាល់ផលិតផលមានផ្ទុកសារធាតុអាកុលនិងថ្នាំជក់នៅលើបណ្តាញសង្គមធំៗពីរមាន Instagram និង Facebook។ សម្រាប់អ្នកដែលចែកចាយមាតិកាទាំងពីរប្រភេទនេះ នឹងទទួលសារឲ្យដាក់កំហិតសម្រាប់តែមនុស្សមានវ័យ ១៨ ឆ្នាំឡើងទៅ។
អ្នកនាំពាក្យក្រុមហ៊ុនមានមូលដ្ឋាននៅទឹកដីសហរដ្ឋអាមេរិកបាននិយាយថា៖ “យើងកំពុងធ្វើបច្ចុប្បន្នភាពលើគោលការណ៍ចែកចាយទំនិញដែលយើងបានហាមឃាត់មានផលិតផលគ្រឿងស្រវឹងនិងថ្នាំជក់សម្រាប់ការផ្សព្វផ្សាយលើ Facebook និង Instagram”។
ជាងនេះសម្រាប់ប្រភេទ Faebook Groups ដែលបង្កើតឡើងសម្រាប់លក់ផលិតផលដូចបញ្ជាក់ទាំងពីរខាងលើ ក៏នឹងទាមទារឲ្យមានការផ្លាស់ប្តូរជាបន្ទាន់ ខណៈនៅលើមុខងារ Marketplace បានធ្វើការហាមឃាត់ជាបណ្តើរៗហើយ៕
