មានការសិក្សារស្រាវជ្រាវថ្មីមួយរបស់ Google បានឲ្យដឹងថា មនុស្សភាគច្រើនពេលនេះ បានយល់ដឹងច្រើនអំពីសុវត្ថិភាពនៅលើ Internet ហើយពួកគេបានប្រើប្រាស់ពាក្យសំងាត់ដែលពិបាកនឹងទាយខ្លាំងជាងមុន។ ទោះជាយ៉ាងនេះក្តី ក៏នៅតែមានមនុស្សរាប់សែននាក់ នៅតែប្រើប្រាស់ឈ្មោះ និងពាក្យសំងាត់ ដែលបានបែកធ្លាយលើកមុន ដោយមិនទាន់បានប្តូរនៅឡើយទេ។
ការរកឃើញនេះ គឺពឹងផ្អែកទៅលើមុខងារបន្ថែមមួយរបស់ Chrome browser ឈ្មោះថា Password Checkup។ មុខងារនេះនឹងបញ្ជូនសារលោតឡើងភ្លាមៗបើសិនជាវេបសាយដែលលោកអ្នកកំពុងតែបើក មាន username និង password ត្រូវគ្នានឹងទិន្ន័យដែលបែកធ្លាយលើកមុនប្រហែលជា ៤ពាន់លានគណនី។
ការសង្កេតដឹងនេះគឺតាមរយៈត្រឹមអ្នកប្រើប្រាស់មុខងារបន្ថែមរបស់ Chrome នេះតែប៉ុណ្ណោះ។ ត្រឹម១ខែដំបូងគឺមានអ្នកតម្លើងមុខងារនេះដល់ទៅ ៦៦៧,០០០នាក់ ហើយបានត្រួតពិនិត្យបាន ២១លានគណនី។ ជាលទ្ធិផលវិភាគក៏បានចេញលទ្ធផលមកថា នៅមានគណនី៣១០,០០០ ទៀតនៅមិនទាន់បានផ្លាស់ប្តូរពាក្យសំងាត់ និងកំពុងប្រើប្រាស់ជារៀងរាល់ថ្ងៃ។
បើសិនជាលោកអ្នកកំពុងប្រើប្រាស់ Google Chrome ជាប្រចាំនោះ សូមទាញយក Password Checkup ដើម្បីងាយស្រួលដឹងថា តើទិន្ន័យរបស់យើងបានបែកធ្លាយនៅលើបណ្តាញInternetដែរឬអត់ ហើយព្យាយាមផ្លាស់ពាក្យសំងាត់ឲ្យបានញឹកញាប់ និងកុំឲ្យងាយស្រួលទាយបាន។
