ជាធម្មតានៅពេលដែលធ្វើការបង្ហោះរូប (Photo Tagging) ជាមួយមិត្តភ័ក្ដិឬសាច់ញាតិដែលមានគណនី Facebook ដូចគ្នា ភ្លាមនោះវានឹងសម្គាល់ដោយស្វ័យប្រវត្តិហើយធ្វើការបង្ហាញឈ្មោះតាមរយៈលក្ខណៈផ្ទៃមុខដែលបានស្កេន ដោយគ្មានឆ្លងកាត់ការអនុញ្ញាតពីសាមីខ្លួនអ្វីទាំងអស់។ យ៉ាងណាមិញមុខងារបែបនេះឬឲ្យឈ្មោះថា “Face Detection” ទីបំផុតត្រូវបាន Facebook សម្រេចធ្វើការកែប្រែជាផ្លូវការហើយ។
ឆ្លើយតបទៅនឹងបណ្តឹងមួយដែលតុលាការអាមេរិកធ្លាប់ចោទប្រកាន់ទៅលើក្រុមហ៊ុន Facebook កាលពីខែមេសា ឆ្នាំ ២០១៨ ជុំវិញការប្រើប្រាស់មុខងារ “Face Detection” ដោយខុសច្បាប់ ព្រោះគ្មានការអនុញ្ញាតពីអ្នកប្រើប្រាស់។យោងតាមសារព័ត៌មាន Engadget បញ្ជាក់ថាតាមការកែប្រែថ្មី Facebook នឹងផ្ញើសារដាស់តឿន (Notification) ទៅកាន់អ្នកប្រើប្រាស់ទូទាំងសកលលោក ដោយផ្តល់សិទ្ធសម្រាប់ពួកគេក្នុងការយល់ព្រមឬបដិសេធឲ្យប្រើប្រាស់មុខងារ “Face Detection” បែបស្វ័យប្រវត្តិនៅលើបណ្តាញសង្គមយក្សដែលកំពុងមានអ្នកប្រើប្រាស់ច្រើនជាង ២ ពាន់លាននាក់។
ជារួមមានន័យថាមិត្តភ័ក្ដិរបស់អ្នកនៅតែអាច Tag គណនីអ្នកទៅក្នុងការបង្ហោះណាមួយបានជាធម្មតា គ្រាន់ថា Facebook នឹងលែងធ្វើការណែនាំបង្ហាញឈ្មោះស្វ័យប្រវត្តិទៀតហើយ ពោលគឺអ្នកអាចប្រើប្រាស់បែប Manually កំណត់ដោយខ្លួនឯងវិញ៕
