Facebook ដឹងថាក្មេងៗកំពុងចំណាយថវិកាទៅលើហ្គេម ទាំងមិនមានការយល់ព្រមពីអាណាព្យាបាល ហើយក្រុមហ៊ុនមិនមានវិធានការអ្វីនោះទេ។ នេះបើតាមឯកសារចំហថ្មីៗពីបណ្តឹងមួយនៅឆ្នាំ ២០១២។
ឯកសារសំខាន់ជាង ១០០ទំព័រ ត្រូវបានបញ្ចេញ ក្រោយការស្នើពីអង្គការ CIR (Center for Investigative Reporting)។ អស់ពេលជាច្រើនឆ្នាំ ក្រុមហ៊ុនបានដឹងថាក្មេងៗកំពុងលេងហ្គេមលើគណនីភ្ជាប់ជាមួយ Credit Card ហើយករណីខ្លះត្រូវបង់កម្រៃច្រើនពាន់ដុល្លារ ត្រឹមការចុចប៊ូតុងក្នុងហ្គេមបង្កើនសមត្ថភាពលេង។
ក្រុមហ៊ុនរបស់សេដ្ឋី Zuckerberg បានមើលរំលង គម្រោងមួយបង្កើតដោយបុគ្គលិកម្នាក់នៅឆ្នាំ ២០១១ ដែលអាចទប់ស្កាត់ក្មេងៗពីការចំណាយលុយ ដោយមិនមានការអនុញ្ញាតពីអាណាព្យាបាល។
ក្មេងលេងហ្គេមកាន់តែច្រើន ចំណូល Facebook ក៏កើនតាមនោះដែរ។ ពេលអាណាព្យាបាលដឹងពីការកាត់លុយពី Credit Card ក៏បានរាយការណ៍ ប៉ុន្តែពិបាកនឹងបានលុយត្រលប់មកវិញពី Facebook ណាស់ រហូតដល់មានការប្តឹងផ្តល់៕
