របាយការណ៍ពីលោក Matt Navarra បានបញ្ជាក់នៅមុននេះថាក្រុមហ៊ុន Facebook នឹងសម្រេចបិទចោលមុខងារ Group Stories ចាប់ពីថ្ងៃទី ២៦ កញ្ញានេះតទៅ ពោលគឺគ្រប់គណនីក្នុង Group ទាំងអស់នឹងមិនអាចបង្ហោះ Stories បានទៀតឡើយ។
មុខងារនេះបានដាក់ឲ្យប្រើប្រាស់អស់រយៈពេល ៩ ខែ ទៅហើយ ប៉ុន្តែតួលេខអ្នកប្រើប្រាស់ហាក់មានកម្រិតទាប ពុំឈានដល់ចំណុចមួយដែល Facebook ចង់បាន ទើបរុញច្រានឲ្យក្រុមហ៊ុនមានមូលដ្ឋាននៅសហរដ្ឋអាមេរិកសម្រេចបិទចោលតែម្តង។
ឆ្លើយតបទៅកាន់សារព័ត៌មាន CNET អ្នកនាំពាក្យរបស់ក្រុមហ៊ុន Facebook បាននិយាយថា៖ “យើងចង់ធានាឲ្យបាននូវមុខងារដែលអាចអនុញ្ញាតឲ្យមនុស្សធ្វើការតភ្ជាប់គ្នាដោយភាពរីករាយនិងមានប្រយោជន៍ ហើយយើងតែងតែរិះរកគ្រប់មធ្យោបាយដើម្បីពង្រឹងនិងកែលំអសម្រាប់សហគមន៍ទាំងមូលរបស់យើង”។បញ្ជាក់ថាមានមនុស្សច្រើនជាង ១,៤ ពាន់លាននាក់កំពុងប្រើប្រាស់ Group នៅលើ Facebook សព្វថ្ងៃ ដែលវាជាទីតាំងនៃក្រុមចែកចាយព័ត៌មានមួយទៅតាមប្រភេទចំណង់ចំណូលចិត្តរបស់អ្នកប្រើប្រាស់។ Facebook បានបដិសេធមិនឆ្លើយតបជុំវិញតួលេខជាក់លាក់នៃអ្នកប្រើប្រាស់មុខងារ Stories ក្នុង Group ត្បិតការប្រកាសបិទចោល ត្រូវឈានចូលមកដល់ក្តី៕
