កាលពីថ្ងៃពុធ Facebook បានប្រាប់ឲ្យដឹងថាបានចាត់ការគណនីក្លែងក្លាយចំនួន ៥,៤ ពាន់លានគណនីនៅក្នុងឆ្នាំ ២០១៩ នេះ ដែលតួលេខនេះសឹងតែស្មើ ២ ដង នៃចំនួនគណនីនៅឆ្នាំ ២០១៨។
Facebook បានលើកឡើងថា ៖ “យើងបានបង្កើនសមត្ថភាពរបស់យើងក្នុងការចាប់ និងប្លុកការប៉ុនប៉ងបង្កើតគណនី Facebook។ យើងអាចប៉ាន់ស្មានបានថាជារៀងរាល់ថ្ងៃ យើងបានទប់ស្កាត់ការប៉ុនប៉ងបង្កើតគណនីក្លែងក្លាយរាប់លានលើក ដោយប្រើប្រាស់ប្រព័ន្ធរបស់យើង។”
បណ្ដាញសង្គមយក្សនេះបានបណ្ដាក់ទុនច្រើនសន្ធឹក ក្នុងការស្វែងរក និងកម្ចាត់គណនីក្លែងក្លាយ ដើម្បីទប់ស្កាត់ការចែករំលែកព័ត៌មានក្លែងក្លាយ និងការរំលោភបំពាននាន។ ក្រៅពីគណនីក្លែងក្លាយ Facebook ក៏បានលុបចេញមាតិកាប្រមាណ ១១,៦ លាន ដែលល្មើសនឹងច្បាប់របស់ Facebook ដែលមានដូចជារូបភាពអាសអាភាសរបស់កុមារៗជាដើម៕
