អតីតម្ចាស់ជើងឯកល្បែង Go (ល្បែងមួយប្រភេទស្រដៀងអុក) Lee Se-dol ដែលជាជនជាតិកូរ៉េខាងត្បូង បានចូលនិវត្តន៍ពីការលេងល្បែងនេះ ដោយប្រាប់ថាហេតុផលដោយសារតែឥទ្ធិពលនៃ AI។
Lee បានប្រាប់សារព័ត៌មាន Yonhap ដូចនេះថា ៖ “ជាមួយនឹងវត្តមានរបស់ AI នៅក្នុងល្បែង Go ខ្ញុំដឹងថាខ្ញុំលែងនៅកំពូលទៀតហើយ ទោះបីជាខ្ញុំជាប់លេខមួយតាមរយៈការខិតខំយ៉ាងវីវក់ក្ដី។ ទោះបីជាខ្ញុំជាប់លេខមួយ វាមានភាគីម្ខាងទៀតដែលមិនអាចមាននរណាផ្ដួលបាន។”
រយៈពេលជាច្រើនឆ្នាំល្បែង Go ត្រូវបានគេចាត់ទុកថាជាល្បែងដ៏ស្មុគស្មាញមួយ ដែលមិនមានកម្មវិធីកុំព្យូទ័រណាអាចឈានដល់កម្រិតស្មុគស្មាញនេះឡើយ។ ល្បែងដែលមានអាយុកាលរាប់ពាន់ឆ្នាំនេះល្បីឈ្មោះដោយសារវាមានភាពសាំញ៉ាំខ្លាំង ដែលផ្លូវដើរក្នុងល្បែងនេះគឺមានច្រើនជាងធាតុអាតូមដែលគេរកឃើញក្នុងចក្រវាលទៅទៀត។
ប៉ុន្តែនៅឆ្នាំ ២០១៦ ពិភពលោកភ្ញាក់ផ្អើលខ្លាំងនៅពេលដែលក្រុមហ៊ុន AI ឈ្មោះ DeepMind កាន់កាប់ដោយ Google អាចផ្ដួលជើងឯក Lee ដោយលទ្ធផល ៤-១ ដោយវាប្រើប្រាស់នូវប្រព័ន្ធ AlphaGo AI។
Lee ធ្លាប់ជាអ្នកលេងល្បែង Go ជាប់ចំណាត់ថ្នាក់លេខ ១ លើពិភពលោកនៅអំឡុងចុងទសវត្សឆ្នាំ ២០០០ ហើយរូបគេធ្លាប់បានទាយថានឹងអាចផ្ដួល AlphaGo AI បានដោយងាយ។ ប៉ុន្តែចុងក្រោយបែរជារន្ធត់ចិត្តដោយសារចាញ់ ហើយបានសុំទោសដល់ពលរដ្ឋកូរ៉េខាងត្បូងទាំងអស់ទៀតផង៕
![](https://i0.wp.com/cdn.nctc.gov.kh/2019/12/5de082a157223_1574994540_medium.jpg?resize=660%2C371&ssl=1)