Facebook បានដាក់ឲ្យប្រើប្រាស់កម្មវិធីថ្មីមួយទាំងនៅលើ App Store និង Google Play Store ដែលវាមានឈ្មោះថា Facebook Viewpoints ដោយកម្មវិធីនេះនឹងផ្ដល់រង្វាន់ដល់អ្នកប្រើប្រាស់ដែលហ៊ានចែករំលែកព័ត៌មានផ្ទាល់ខ្លួនមួយចំនួន។
ក្រោយពីបង្កើតគណនី អ្នកនឹងត្រូវសុំឲ្យចូលរួម Program មួយចំនួន ហើយមុន Program ចាប់ផ្ដើម Facebook នឹងពន្យល់ថាព័ត៌មានអ្វីខ្លះដែលក្រុមហ៊ុនត្រូវប្រមូលយក និងយកទៅប្រើប្រាស់នៅទីណាមខ្លះ ហើយព័ត៌មានទាំងនោះមានពិន្ទុប៉ុន្មាន។ ក្នុងកម្មវិធីនេះ មាន Program មួយដែលសួរសំនួរចំនួន ៨៣ សំនួរ ដែលអ្នកប្រើប្រាស់ចំណាយពេល ១៥ នាទីដើម្បីឆ្លើយ ពេលឆ្លើយរួចនឹងទទួលបាន ១ ពាន់ពិន្ទុ ហើយ Facebook នឹងផ្ញើលុយ ៥ ដុល្លារ ចូលតាមគណនី PayPal សម្រាប់ ១ ពាន់ពិន្ទុនេះ។
Facebook បានឲ្យដឹងថាពួកគេនឹងប្រើប្រាស់ព័ត៌មានដែលទទួលបាន ដើម្បីធ្វើការកែសម្រួលផលិតផលដូចជា Facebook, Instagram, WhatsApp, Portal និង Oculus ឲ្យកាន់តែល្អប្រសើរសម្រាប់ផលប្រយោជន៍សហគមន៍។
បច្ចុប្បន្ននេះ Viewpoints មានសម្រាប់តែអ្នកប្រើប្រាស់ Facebook នៅសហរដ្ឋអាមេរិកប៉ុណ្ណោះ ដោយក្រុមហ៊ុនគ្រោងនឹងពង្រីកវិសាលភាពដល់អ្នកប្រើប្រាស់ក្នុងប្រទេសដទៃទៀតនៅឆ្នាំ ២០២០៕
![](https://i0.wp.com/cdn.nctc.gov.kh/2019/12/5ddc8acc176de_1574734500_medium.jpg?resize=696%2C449&ssl=1)