ទីក្រុងសេអ៊ូល ៖ ក្រុមហ៊ុន LG Chem របស់ប្រទេសកូរ៉េខាងត្បូងបាននិយាយនៅថ្ងៃពុធថាក្រុមហ៊ុនរបស់ខ្លួនបានបញ្ជូនគណៈប្រតិភូទៅកាន់ប្រទេសឥណ្ឌាដើម្បីធ្វើការស៊ើបអង្កេតអំពីមូលហេតុនៃការលេចធ្លាយឧស្ម័នពុលនៅរោងចក្រគីមីនៅប្រទេសឥណ្ឌា។
ហេតុការណ៍ធ្លាយឧស្ម័នពុលបានសម្លាប់មនុស្សចំនួន ១១នាក់ និងបណ្តាលឱ្យមានមនុស្សចំនួន៨០០នាក់ចូលមន្ទីរពេទ្យសម្រាកព្យាបាលការពុល។ ក្រុមហ៊ុន LG Chem បាននិយាយថា គណៈប្រតិភូមានសមាជិក ៨ នាក់ ដឹកនាំដោយប្រធានអាជីវកម្មគីមីឥន្ធនៈរបស់ក្រុមហ៊ុននឹងផ្តល់នូវវិធានការណ៍ខ្លីៗដល់ប្រជាជនដែលរងផលប៉ះពាល់ និងទៅជួបជាមួយមន្ត្រីរដ្ឋាភិបាលប្រទេសឥណ្ឌា។
ឧប្បត្តិហេតុធ្លាយឧស្ម័នបានកើតឡើងនៅទីតាំងមួយដែលស្ថិតនៅចម្ងាយ ១៤គីឡូម៉ែត្រពីឆ្នេរខាងកើតនៃទីក្រុង Visakhapatnam នៅភាគខាងត្បូងរដ្ឋ Andhra Pradesh ដែលដំណើរការដោយក្រុមហ៊ុន LG Polymers។
LG Polymers គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតគីមីឥន្ធនៈធំបំផុតរបស់ប្រទេសកូរ៉េខាងត្បូងគឺក្រុមហ៊ុន LG Chem ៕
Reuters ផ្សាយថ្ងៃទី១៣ ខែឧសភា ឆ្នាំ២០២០
