រដ្ឋាភិបាលមានប្រសាសន៍ថា គ្រាប់បែកនៅតាមដងផ្លូវបានផ្ទុះចំរថយន្តក្រុងតូចមួយ នៅជិតរដ្ឋធានីរបស់ប្រទេសសូម៉ាលី។
ហេតុការណ៍នោះសម្លាប់មនុស្សយ៉ាងហោចណាស់ ១០នាក់ និងបណ្តាលឱ្យមនុស្ស ១២នាក់ផ្សេងទៀតរងរបួស។ ការផ្ទុះដ៏សាហាវនេះបានកើតឡើងនៅក្បែរភូមិ Lafole តាមបណ្តោយផ្លូវ Afgoye-Mogadishu ខណៈដែលរថយន្តក្រុងដឹកអ្នកដំណើរកំពុងធ្វើដំណើរនៅថ្ងៃអាទិត្យ។
ពុំទាន់មានការអះអាងទទួលខុសត្រូវភ្លាមៗចំពោះការផ្ទុះនៅលើផ្លូវដែលផ្លូវនោះត្រូវបានប្រើប្រាស់ជាញឹកញាប់ដោយរដ្ឋាភិបាល និងរថយន្តសន្តិសុខ។ សាក្សីបាននិយាយថារថយន្ដខ្នាតតូចរងការបំផ្លាញទាំងស្រុង។ សាក្សីបានរៀបរាប់បន្ថែមអំពីឈុតឆាកដ៏រន្ធត់មួយដែលមនុស្សគ្រប់គ្នានៅលើរថយន្តទាំងអស់ស្លាប់ និងរងរបួស ហើយសាកសពជាច្រើនបែកខ្ទេចខ្ទី ឬឆេះហួសមើលលែងស្គាល់។
អស់រយៈពេលមួយទស្សវត្សន៍មកហើយ ដែលក្រុម al-Shabab បាន និងកំពុងប្រយុទ្ធដើម្បីផ្តួលរំលំរដ្ឋាភិបាលដែលមានការទទួលស្គាល់ជាអន្តរជាតិរបស់ប្រទេសសូម៉ាលី។ ក្រុមប្រដាប់អាវុធដែលមានទំនាក់ទំនងជាមួយអាល់កៃដា (al-Qaeda) ធ្លាប់គ្រប់គ្រងនៅក្នុងតំបន់ភាគច្រើន ប៉ុន្តែចាប់តាំងពីឆ្នាំ២០១១ មកយុទ្ធជនរបស់ពួកគេបានចាកចេញពីទីប្រជុំជន និងទីក្រុងធំៗជាច្រើនដែលរួមមានទីក្រុង Mogadishu។ ទោះជាយ៉ាងណា ក្រុមនោះបានបន្តអនុវត្តការបំផ្ទុះគ្រាប់បែកអត្តឃាត និងការធ្វើឃាតក្នុងទីក្រុងនិងតំបន់ជុំវិញនោះ ៕
ប្រភពព័ត៌មាន RT ផ្សាយថ្ងៃទី៣១ ខែឧសភា ឆ្នាំ២០២០
