ប្រទេសអេស្ប៉ាញគ្រោងនឹងបន្ធូរបន្ថយការបិទប្រទេសដោយសារតែការឆ្លងមេរោគកូរ៉ូណាវីរុសនេះនៅក្នុងទីក្រុងធំបំផុតចំនួនពីររបស់ខ្លួនចាប់ពីថ្ងៃច័ន្ទខាងមុខនេះ ប៉ុន្តែប្រទេសនេះនឹងមិនចាប់ផ្តើមបើកព្រំដែនរបស់ខ្លួនទៅកាន់ភ្ញៀវទេសចរបរទេសមុនថ្ងៃទី ១ ខែកក្កដាឡើយ។
រដ្ឋមន្ត្រីក្រសួងសុខាភិបាល Salvador Illa និយាយកាលពីថ្ងៃសុក្រថាការរឹតបន្តឹងមួយចំនួននឹងត្រូវបានដកនៅក្នុងទីក្រុងម៉ាឌ្រីត និងបាសេឡូណាដែលរហូតមកដល់ពេលនេះនៅពីក្រោយកម្មវិធីបន្ធូរបន្ថយការរឹតបន្តឹងនៅក្នុងប្រទេស។
ចាប់ពីថ្ងៃច័ន្ទនេះ អតិថិជនរបស់បារ និងភោជនីយដ្ឋាននឹងត្រូវបានអនុញ្ញាតឱ្យអង្គុយនៅខាងក្រៅហាង ហើយក្មេងៗនឹងអាចលេងនៅខាងក្រៅបាននៅពេលថ្ងៃ។
រដ្ឋមន្ត្រីក្រសួងទេសចរណ៍ Reyes Maroto និយាយនៅថ្ងៃព្រហស្បតិ៍នេះថា ព្រំប្រទល់ដីនឹងបើកឡើងវិញចាប់ពីថ្ងៃទី ២២ ខែមិថុនា ប៉ុន្តែក្រោយមកក្រសួងរបស់លោកស្រីក៏ប្រកាសអំពីកាលបរិច្ឆេទសម្រាប់ថ្ងៃទី ១ ខែកក្កដាវិញ នេះបើអ្នកនាំពាក្យរដ្ឋាភិបាលលោកស្រី Maria Jesus Montero បានប្រាប់អ្នកយកព័ត៌មាន។ “វានឹងមិនមានការផ្លាស់ប្តូរជំហររបស់រដ្ឋាភិបាលទេ” ៕
សម្រួល៖ សុផា
ប្រភព RT ចុះផ្សាយថ្ងៃទី ៥ ខែមិថុនា ឆ្នាំ ២០២០
