យ៉ាងហោចណាស់មានសមាជិកឧទ្ទាមចំនួន ៥នាក់ត្រូវបានសម្លាប់ដោយកងកម្លាំងឥណ្ឌានៅសង្កាត់ Shopian ក្នុងតំបន់កាស្មៀរគ្រប់គ្រងដោយឥណ្ឌា។ ហេតុការណ៍នេះកើតឡើងនៅថ្ងៃអាទិត្យបង្កឱ្យមានការតវ៉ាពីសំណាក់ប្រជាពលរដ្ឋនៅក្នុងតំបន់នោះ។
ភ្នាក់ងារសារព័ត៌មាន Associated Press បានដកស្រង់សម្តីអ្នកនាំពាក្យកងទ័ពឥណ្ឌាលោកវរសេនីយ៍ឯក Rajesh Kalia ថាកងទ័ព និងប៉ូលិសបានឡោមព័ទ្ធភូមិមួយនៅភាគខាងត្បូងនៃសង្កាត់ Shopian ក្រោយពីទទួលបានដំណឹងថា ក្រុមឧទ្ទាមមួយចំនួនកំពុងលាក់ខ្លួននៅទីនោះ។
លោក Kalia និយាយថា មានការបាញ់កាំភ្លើងតបតគ្នានាំឱ្យមានការសម្លាប់សកម្មប្រយុទ្ធចំនួន០៥នាក់។ អ្នកស្រុកប្រាប់ភ្នាក់ងារសារព័ត៌មាន AP ថា កំលាំងទ័ពបានបំផ្លាញផ្ទះមួយដោយប្រើគ្រឿងផ្ទុះ។ ការតវ៉ា និងការប៉ះទង្គិចបានកើតឡើងនៅពេលដែលអ្នកស្រុកចំនួនរាប់រយនាក់បានព្យាយាមហែក្បួនទៅកាន់ទីតាំងកើតហែតុ។
ពុំមានរបាយការណ៍ពីការស្លាប់និងរបួសភ្លាមៗទេនៅក្នុងការប៉ះទង្គិចគ្នានេះ។ នៅក្នុងការស្រែកលើកពាក្យស្លោកទាមទារឱ្យមានការបញ្ចប់ការកាន់កាប់ទឹកដីកាស្មៀររបស់ឥណ្ឌា បាតុករទាំងនោះបានគប់ដុំថ្មទៅលើប៉ូលិស និងទាហានប៉ារ៉ាដែលបាញ់គ្រាប់កាំភ្លើង និងប្រើឧស្ម័នបង្ហូរទឹកភ្នែក។
ទាក់ទងទៅនឹងការប៉ះទង្គិចគ្នា ប្រទេសឥណ្ឌាបានបង្កើនប្រតិបត្តិការរបស់ខ្លួននៅទូទាំងតំបន់កាស្មៀរនៅក្នុងរយៈពេលប៉ុន្មានខែថ្មីៗនេះ។ ប៉ូលិសនិយាយថា សមាជិកឧទ្ទាមចំនួន ៧៣នាក់ត្រូវបានសម្លាប់នៅក្នុងតំបន់កាស្មៀ ហើយភាគច្រើនពួកគេជាជនជាតិម៉ូស្លីម។នៅខែមេសាសមាជិកឧទ្ទាមច្រើនជាង២០នាក់ និងកងទ័ពឥណ្ឌាប្រហែលចំនួន១២ នាក់ត្រូវបានសម្លាប់ ដែលនេះជាចំនួនច្រើនបំផុតចាប់ពីខែសីហាឆ្នាំ២០១៩ នៅពេលដែលប្រទេសឥណ្ឌាដកហូតឋានៈពាក់កណ្តាលស្វ័យភាព និងនិងដាក់វិធានសហព័ន្ធដោយផ្ទាល់។
គួរំលឹកផងដែរថា ចាប់តាំងពីឆ្នាំ១៩៨៩មក ក្រុមឧទ្ទាមកាស្មៀរបានធ្វើការប្រយុទ្ធអស់ជាច្រើនទសវត្សដើម្បីឯករាជ្យភាពក្នុងតំបន់ ឬការចូលរួមជាមួយកំលាំងប៉ាគីស្ថាន។ ការប្រយុទ្ធនោះបណ្តាលឱ្យមានមនុស្សស្លាប់ជិតចំនួន៧ម៉ឺននាក់ ដែលភាគច្រើនពួកគេជាជនស៊ីវិល។
ប្រទេសឥណ្ឌាចោទលើប្រទេសប៉ាគីស្ថានពីបទបំពាក់អាវុធ និងបណ្តុះបណ្តាលក្រុមឧទ្ទាមប្រឆាំងឥណ្ឌា។ ប៉ាគីស្ថានបដិសេធការលើកឡើងនេះដោយនិយាយថា ពួកគេផ្តល់តែការគាំទ្រខាងសីលធម៌ និងការទូតដល់ក្រុមឧទ្ទាម និងជនស៊ីវិលកាស្មៀរីដែលប្រឆាំងនឹងការគ្រប់គ្រងរបស់ឥណ្ឌា។
ប្រែសម្រួល៖ប៉ោក លក្ខិណា
ប្រភពព័ត៌មាន Aljazeera ផ្សាយថ្ងៃទី០៧ ខែមិថុនា ឆ្នាំ២០២០
