ប្រទេសអូស្ត្រាលីចាប់ផ្តើមបង្កើតប្រតិបត្តិការបណ្តុះបណ្តាលដល់កងទ័ពអ៊ីរ៉ាក់ដើម្បីប្រយុទ្ធប្រឆាំងជាមួយនឹងក្រុមឧទ្ទាម ISIS ចាប់តាំងពីឆ្នាំ២០១៥មក។ ប្រតិបត្តិការបណ្តុះធ្វើឡើងនៅឧទ្យានយោធា Tajiក្នុងប្រទេសអ៊ីរ៉ាក់។ ក្រោយមកប្រតិបត្តិការបណ្តុះនោះក៏ត្រូវបញ្ចប់នៅដើមឆ្នាំ២០២០ ដោយសារតែមានបញ្ហាជំងឺឆ្លងកូវីដ១៩។
បច្ចុប្បន្ននេះ ពុំមានកំលាំងកងទ័ពអូស្ត្រាលីនៅសេសសល់ក្នុងឧទ្យានយោធា Taji នៅក្រុងបាកដាដទៀតទេហើយបេសកកម្មក៏ត្រូវបានបញ្ចប់។ កងទ័ពអូស្ត្រាលីបានជួយបណ្តុះ បណ្តាលដល់សមាជិកទ័ពអ៊ីរ៉ាក់ចំនួន ៤៧,០០០នាក់តាមរយៈកម្មវិធីរួមគ្នាកសាងសមត្ថភាពរវាងប្រទេសអូស្ត្រាលី និងនូវែលហ្សេឡង់ (Australia-New Zealand Building Partner Capacity Program )។
រដ្ឋមន្ត្រីក្រសួងការពារជាតិលោកស្រី Linda Reynolds មានប្រសាសន៍ថា គំនិតផ្តួចផ្តើមនេះមានសារៈសំខាន់ណាស់ក្នុងការជួយកម្ចាត់ឧទ្ទាមISIS។លោកស្រីមានប្រសាសន៍ថាក្រោយពីបានស្វែងយល់ពីដំណើរការសំខាន់ៗដើម្បីប្រឆាំងឧទ្ទាម និងការហ្វឹកហាត់បង្កើនសមត្ថភាពរបស់កងកំលាំងការពារសន្តិសុខអ៊ីរ៉ាក់មានន័យថា បេសកកម្មបណ្តុះបណ្តាលរបស់យើងនៅឧទ្យានយោធា Taji ឈានដល់ដំណាក់កាលធ្វើការសន្និដ្ឋានសមហេតុផល និងត្រូវបានបញ្ចប់ជាស្ថាពរ។
គួរបញ្ជាក់បន្ថែមផងដែរថា នៅខែវិច្ឆិកា ឆ្នាំ២០១៩ ដៃគូក្នុងស្រុករបស់អូស្ត្រាលីគឺសាលាកុមារអ៊ីរ៉ាក់គឺជាកន្លែងដំបូងបង្អស់ដែលកំលាំងចម្រុះបានប្រើប្រាស់ដើម្បីធ្វើការប្រកាសពីសមត្ថភាពប្រតិបត្តិការឯករាជ្យពេញលេញ ដោយបានផ្ទេរការទទួលខុសត្រូវផ្នែកបណ្តុះបណ្តាលដល់រដ្ឋាភិបាលអ៊ីរ៉ាក់វិញ៕
ប្រែសម្រួល៖ប៉ោក លក្ខិណា
ប្រភពព័ត៌មាន dailymail ផ្សាយថ្ងៃទី០៥ ខែមិថុនា ឆ្នាំ២០២០
