ហុងកុង៖ ក្មេងជំទង់ម្នាក់អាយុ១៦ឆ្នាំ និងស្ត្រីអាយុ ៥២ឆ្នាំម្នាក់ត្រូវសមត្ថកិច្ចចាប់ខ្លួននៅថ្ងៃច័ន្ទក្នុងទីក្រុងហុងកុងពីបទសង្ស័យផលិតឬកាន់កាប់គ្រឿងផ្ទុះ។
អគ្គនាយកការិយាល័យគ្រឿងញៀនរបស់ប៉ូលិសហុងកុង លោក Chow Cheung-yau បានប្រាប់សន្និសីទកាសែតថា ប៉ូលិសបានតាមដានលើអ្នកដែលទិញគ្រឿងផ្សំគីមីឆៅសម្រាប់ផលិតគ្រឿងផ្ទុះពីក្រៅប្រទេសលើអ៊ីនធឺរណិតចាប់តាំងពីខែវិច្ឆិកាឆ្នាំមុនមក។
ក្រោយពីបានធ្វើការស៊ើបអង្កេតយ៉ាងហ្មត់ចត់ ប៉ូលិសបានឈានទៅដល់ធ្វើការចាប់ខ្លួនមនុស្សទាំង០២នាក់ក្នុងបន្ទប់ស្នាក់នៅចំនួន០២កន្លែងនៅក្នុងតំបន់ Wan Chai និងរឹបអូសបានអាវុធក្លែងក្លាយចំនួន០៤ដើម និងសារធាតុគីមីមួយចំនួននៅក្នុងផ្ទះល្វែង។
មន្ត្រីកម្ចាត់គ្រាប់បែកនៃការិយាល័យកំចាត់មីនផ្ទុះ លោក Suryanto Chin-chiu មានប្រសាសន៍ថា សម្ភារៈទាំងនោះអាចត្រូវបានប្រើប្រាស់ដើម្បីផលិតសារធាតុគីមី ឬរំសេវផ្ទុះហើយសារធាតុគីមីមួយចំនួនស្ថិតក្នុងស្ថានភាពមិនស្ថិតស្ថេរ។ ក្នុងករណីមានគ្រោះថ្នាក់វាអាចបណ្តាលឱ្យមានការឆេះ ឬផ្ទុះនៅក្នុងអគារលំនៅដ្ឋាន៕
ប្រភពព័ត៌មាន Xinhua ផ្សាយថ្ងៃទី០៨ ខែមិថុនា ឆ្នាំ២០២០
