ម៉ូស្កូ៖ សមាជិករបស់អង្គការភេរវករ (ISIS) លោក Mohammad Hussein Saud សារភាពថា ភ្នាក់ងារស៊ើបការណ៍សម្ងាត់អង់គ្លេសបានជ្រើសរើសរូបលោកអោយឃ្លាំមើលនិងថតរូបនៅទីតាំងយោធាស៊ីរី និងរុស្ស៊ីក្នុងប្រទេសស៊ីរី។
នៅក្នុងចម្លើយសារភាពចេញផ្សាយដោយភ្នាក់ងារសារព័ត៌មាន TASS របស់ប្រទេសរុស្ស៊ីបានឱ្យដឹងថា លោក Mohammad Hussein Saud ជាសមាជិកភេរវករក្នុងទីក្រុង Palmyra បានធ្វើការសារភាពថា ភ្នាក់ងារស៊ើបការណ៍សម្ងាត់អង់គ្លេសបានជ្រើសរើសយករូបលោកឱ្យធ្វើការជាចារជនក្រោយពីលោកបានសម្រេចចិត្តវិលត្រឡប់ទៅទីក្រុង Palmyra ក្នុងប្រទេសស៊ីរ៉ីវិញ។ ភ្នាក់ងារស៊ើបការណ៍អង់គ្លេសបានទាក់ទងលោកតាមរយៈអន្តរការី និងណែនាំឱ្យលោកធ្វើជាចារជន ហើយបានឱ្យលោកធ្វើដំណើរត្រលប់ទៅទីក្រុង Palmyra ។
លោក Saud ត្រូវគេប្រាប់ថា លោកនឹងទទួលបានប្រាក់ ទូរស័ព្ទ និងរបស់របរផ្សេងទៀតតាមដែលលោកត្រូវការ ហើយភារកិច្ចរបស់លោកគឺថតរូបទីតាំងយោធាស៊ីរី និងរុស្ស៊ី និងបញ្ជូនរូបភាពទាំងនោះតាមប្រព័ន្ធអ៊ីនធឺរណិត។ លោកនិយាយថា លោកបានជួបភ្នាក់ងារស៊ើបការណ៍សម្ងាត់អង់គ្លេសនៅព្រំដែនរវាងប្រទេសស៊ីរី និងហ្ស៊កដានី ជាតំបន់កាន់កាប់ដោយកងទ័ពសហរដ្ឋអាមេរិក ក្រោយពីលោកបានភៀសខ្លួនចេញពីទីក្រុង Palmyra ជាកន្លែងដែលលោកធ្វើចលនាភេវរករ។
លោក Saud បន្ថែមថា ភ្នាក់ងារស៊ើបការណ៍អង់គ្លេសមានបំណងប្រមូលយកព័ត៌មានពីទីតាំងសំខាន់ៗរបស់រុស្ស៊ីនៅក្នុងប្រទេសស៊ីរី និងរបៀបដែលពួកគេធ្វើប្រតបត្តិការការពារ ដូច្នេះពួកគេទាំងនោះនឹងអាចត្រូវបានកំណត់គោលដៅនៅពេលក្រោយ។ លោកបានលើកបញ្ជាក់បន្ថែមទៀតថា ភ្នាក់ងារស៊ើបការណ៍សម្ងាត់អង់គ្លេសថែមទាំងបានជ្រើសរើសអតីតមគ្គុទេសទេសចរណ៍ម្នាក់ពីទីក្រុងPalmyra ដែលមានសមត្ថភាពនិយាយបានច្រើនភាសាដោយចាត់ឱ្យបុរសរូបនោះទទួលបន្ទុកដឹកនាំសមាជិកចារជនរបស់ប្រទេសអង់គ្លេស៕
ប្រភពព័ត៌មាន SANA ផ្សាយថ្ងៃទី ០៨ ខែមិថុនា ឆ្នាំ២០២០
