យន្តហោះទ័ពអាកាសអាមេរិកប្រភេទ Air Force C-130 មួយគ្រឿងបានធ្លាក់ចេញពីផ្លូវរត់នៅឯជំរុំ Taj Taj ក្នុងប្រទេសអ៊ីរ៉ាក់នៅពីថ្ងៃច័ន្ទនេះ បណ្តាលឱ្យមនុស្ស ៤នាក់រងរបួស។
អ្នកនាំពាក្យវរសេនីយ៍ឯក Myles B. Caggins បាននិយាយថា យន្ដហោះនេះបើកហួសផ្លូវ ហើយបានធ្លាក់ នៅថ្ងៃទី៨ ខែមិថុនា ប្រហែលម៉ោង ១០:១០យប់ (ម៉ោងនៅអ៊ីរ៉ាក់)។
យន្តហោះអាមេរិកប្រភេទ Air Force C-130 បានចុះចតនៅឯមូលដ្ឋានទ័ព្ទអាកាស Taji ប្រទេសអ៊ីរ៉ាក់ តែបានហួសផ្លូវហើយបុកជញ្ជាំងដែលបណ្តាលឱ្យខូចយន្តហោះ រងរបួសមនុស្ស៤នាក់។ ក្រុមពន្លត់អគ្គីភ័យ និងក្រុមអ្នកជួយសង្គ្រោះបានស្ថិតនៅកន្លែងកើតហេតុអស់រយៈពេល ៤នាទី ហើយបានពន្លត់ភ្លើង និងជួយជម្លៀសមនុស្សចេញពីយន្តហោះ។
មន្ត្រីអ៊ីរ៉ាក់ម្នាក់បានប្រាប់សារព័ត៌មាន Associated Press ថាមាននាវិក ៧នាក់ និងអ្នកដំណើរ ២៦នាក់ស្ថិតនៅលើយន្តហោះ C-130 នេះ ហើយអ្នកបើកយន្តហោះ ២នាក់ក្នុងចំណោមសមាជិកសេវាកម្មទាំង ៤នាក់បានរងរបួស។
ឧប្បត្តិហេតុនេះកំពុងស្ថិតនៅក្រោមការស៊ើបអង្កេត ហើយក៏មិនមានការសង្ស័យថាបណ្តាលមកពីសកម្មភាពរបស់សត្រូវឡើយ។ បើទោះបីជាឧប្បត្តិហេតុនេះមិនជាប់ទាក់ទងជាមួយសត្រូវក៏ដោយតែវានៅតែស្ថិតក្រោមការស៊ើបអង្កេត។
គួររំលឹកថាយន្តហោះប្រភេទ C-130 គឺជាយន្តហោះដឹកជញ្ជូនរបស់យោធាដែលប្រើប្រាស់ដោយសហរដ្ឋអាមេរិក និងកងកម្លាំងចម្រុះ៕
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ៩ ខែមិថុនា ឆ្នាំ២០២០
