នៅថ្ងៃចន្ទ ទាហានស៊ីរ៉ីបានប្រឈមនឹងការវាយប្រហារដែលធ្វើឡើងដោយក្រុមភេរវករនៅទីក្រុង al-Tanjara និង Fatatra axis នៅក្នុងរដ្ឋធានី Hama នៃប្រទេសស៊ីរ៉ី។
ប្រភពព័ត៌មានពីយោធាប្រាប់ភ្នាក់ងារសារព័ត៌មាន SANA ថា ក្រុមភេរវករប្រដាប់អាវុធមានទីតាំងនៅភាគខាងជើងតំបន់ Ghab នៅម៉ោង ១៣និង៣០នាទី នៅថ្ងៃទី០៨ ខែមិថុនា ឆ្នាំ២០២០ បានធ្វើការវាយប្រហារដោយបំផ្ទុះគ្រាប់បែករថយន្ត និងបំផ្ទុះគ្រាប់បែកអត្តឃាតនៅទីតាំងយោធាចំនួនពីរនៅក្នុងទីក្រុង al-Tanjara និង al-Fatatra ។
កម្លាំងទាហានស៊ីរីបានប្រឈមជាមួយនឹងការវាយប្រហារ។ ក្រោយពីមានការប៉ះទង្គិចគ្នាយ៉ាងខ្លាំងអស់រយៈពេលជាច្រើនម៉ោង ទាហានស៊ីរ៉ីអាចដណ្តើមបានការគ្រប់គ្រងទីតាំងយោធាចំនួនពីរមកវិញ។ ប្រតិបត្តិការរបស់ទ័ពស៊ីរ៉ីបណ្តាលឱ្យភាគីភេរវកររងការខូចខាតយ៉ាងធ្ងន់ធ្ងរ ព្រមទាំងរឹបអូសបានអាវុធរបស់ភេរវករ និងសម្ភារៈមួយចំនួន ព្រមទាំងរថយន្តដែលដឹកស៊ីនកាំភ្លើង១៤.៥ ។
ស្ថានការណ៍បានវិលមករកភាពធម្មតាវិញ ហើយភេរវករដែលនៅសេសសល់បានរត់គេចខ្លួនដោយបន្សល់ទុកសាកសពរបស់សមាជិកភេរវករមួយចំនួនដែលត្រូវបានសម្លាប់នៅទីនោះ។ ទាហានស៊ីរ៉ីម្នាក់បានស្លាប់ និងទាហានជាច្រើននាក់ទៀតរងរបួសផងដែរ៕
បកប្រែដោយ៖ លក្ខិណា
ប្រភពព័ត៌មាន SANA ផ្សាយថ្ងៃទី០៨ ខែមិថុនា ឆ្នាំ២០២០
