អ្នកនាំពាក្យរដ្ឋាភិបាលលោកស្រី Lulwa Rashed al-Khater មានប្រសាសន៍ថា ប្រទេសកាតានឹងចាប់ផ្តើមដកការរឹតត្បិតលើករណីមេរោគឆ្លងកូវីដ១៩ ចំនួន៤ ដំណាក់កាលដែលដំណាក់កាលទី១នឹងចាប់ផ្តើមនៅថ្ងៃទី១៥ ខែមិថុនា។
លោកស្រីប្រាប់អ្នកយកព័ត៌មានថា ដំណាក់កាលទី២ នៃការបន្ធូរបន្ថយការបិទដំណើរនឹងចាប់ផ្តើមនៅថ្ងៃទី០១ ខែកក្កដា លើកទី៣ នៅថ្ងៃទី០១ ខែសីហា និងលើកទី៤ នៅថ្ងៃទី០១ ខែកញ្ញា។
លោកស្រី បានមានប្រសាសន៍នៅថ្ងៃចន្ទថា ការបិទដំណើរនឹងអាចត្រូវបានដាក់ឡើងវិញ ឬដំណាក់កាលទាំងនោះនឹងត្រូវពន្យារពេលបើសិនជាចាំបាច់។ ដំណាក់កាលទី២ នឹងអនុញ្ញាតឱ្យមានការបើកភោជនីយដ្ឋានមួយចំនួន និងដំណាក់កាលទី៣នឹងអនុញ្ញាតឱ្យមានការបន្តជើងហោះហើរពីបណ្តាប្រទេសដែលមានហានិភ័យឆ្លងជំងឺទាប និងការបើកផ្សារទំនើប និងផ្សារធម្មតាឡើងវិញជាមួយនឹងការកំណត់លើវិសាលភាពនៃដំណើការ។ អាទិភាពលើជើងហោះហើរនឹងត្រូវផ្តល់ជូនអ្នកកាន់ទិដ្ឋាការស្នាក់នៅ។
ភ្នាក់ងារព័ត៌មានរាយការណ៍ថា អ្នកគ្រប់គ្នាដែលធ្វើដំណើរចូលប្រទេសកាតានឹងត្រូវឆ្លងកាត់ការធ្វើចតាឡីស័ករយៈពេល២សប្តាហ៍នៅក្នុងសណ្ឋាគារដែលត្រូវបានរៀបចំជាពិសេសពួកគេនឹងត្រូវធ្វើការចំណាយដោយផ្ទាល់ខ្លួន។ ដំណាក់កាលទី៤នឹងអនុញ្ញាតឱ្យវិហារអ៊ីស្លាមទាំងអស់ចាប់ផ្តើមប្រតិបត្តិការធម្មតា ហើយសម្រាប់កាលវិភាគហោះហើរនឹងត្រូវបានអនុញ្ញាតិឱ្យមានដំណើរការបន្ថែម។ ដំណាក់កាលទី៤ នឹងរួមបញ្ចូលទាំងការដកដំណើរការបិទលើស្ថាប័នអប់រំឱ្យបានទាន់ពេលវេលាសម្រាប់ឆ្នាំសិក្សាថ្មី។
គួររំលឹកផងដែរថា នៅចុងខែធ្នូ ឆ្នាំ២០១៩ មន្ត្រីចិនបានជូនដំណឹងដល់អង្គការសុខភាពពិភពលោក (WHO) ពីការផ្ទុះឡើងនៃជំងឺរលាកសួតដែលមិនធ្លាប់មានពីមុនមកនៅក្នុងទីក្រុងWuhanស្ថិតនៅភាគកណ្តាលប្រទេសចិន។ ចាប់តាំងពីពេលនោះមកមានករណីឆ្លង មេរោគដែលអង្គការសុខភាពពិភពលោកកំណត់ឈ្មោះថាជាជំងឺកូវីដ១៩ ត្រូវបានគេរាយការណ៍ថា មានករណីឆ្លងនៅគ្រប់តំបន់នៅក្នុងពិភពលោកក្នុងនោះរួមមានទាំងនៅប្រទេសរុស្ស៊ីផងដែរ។
នៅពេលបច្ចុប្បន្ននេះ មានមនុស្សច្រើនជាងចំនួន៦,៩លាននាក់នៅលើពិភពលោកដែលត្រូវបានគេធ្វើរោគវិនិច្ឆ័យឃើញថាមានផ្ទុកជំងឺកូវីដ១៩ ។ សហរដ្ឋអាមេរិកបានបញ្ជាក់ពីចំនួនឆ្លងសរុបដែលជាចំនួនឆ្លងខ្ពស់បំផុតមានចំនួន១,៩២០,០៦១ ។ ប្រទេសប្រេស៊ីលបញ្ជាក់ថា មានករណីឆ្លងជំងឺកូវីដចំនួន ៦៧២,៨៤៦ករណី ប្រទេសរុស្ស៊ីចំនួន ៤៦៧,០៧៣ ករណី និងចក្រភពអង់គ្លេសចំនួន២៨៦,២៩៤ករណី៕
ប្រែសម្រួល៖ ប៉ោក លក្ខិណា
ប្រភពព័ត៌មានRT ផ្សាយថ្ងៃទី០៩ ខែឧសភា ឆ្នាំ២០២០
