អ្នកយកព័ត៌មាន TASS ម្នាក់រាយការណ៍ពីបន្ទប់សវនាការនៅយប់ថ្ងៃព្រហស្បតិ៍ថា គណៈវិនិច្ឆ័យបានរកឃើញវរសេនីយ៍ឯកអូទ្រីស លោក Martin M មានអាយុ ៧១ឆ្នាំ ក្នុងវ័យចូលនិវត្តន៍ មានកំហុសពីបទបង្ហាញអាថ៌កំបាំងរបស់រដ្ឋ និងអាថ៌កំបាំងយោធាដោយចេតនា និងអាចបង្កឱ្យមានការអន្តរាយដល់ប្រទេសអូទ្រីស និងបានបម្រើផលប្រយោជន៍ដល់ប្រទេសរុស្ស៊ី។ បុរសនោះត្រូវបានកាត់ទោសឱ្យជាប់ពន្ធនាគាររយៈពេល ៣ឆ្នាំ។
អ្នកនាំពាក្យតុលាការបានប្រាប់ភ្នាក់ងារសារព័ត៌មាន TASS ថា អតីតមន្ត្រីជាន់ខ្ពស់រូបនេះ បានជាប់ឃុំខ្លួនបណ្តោះអាសន្នរយៈពេល ១៨ខែ ហើយជាមួយគ្នានេះដែរ ពេលនេះត្រូវរាប់ថាជាពេលវេលាដែលលោកជាប់ពន្ធនាគារ។ ប្រសិនបើសាលក្រមចូលជាធរមាន ការសម្រេចចិត្តមួយអាចត្រូវបានធ្វើឡើងដើម្បីដោះលែងជនជាប់ចោទឱ្យមានសេរីភាព។
សាលក្រមមិនទាន់ចូលជាធរមានទេ ក្រុមមេធាវីការពារក្តីមិនបានដាក់ពាក្យបណ្តឹងព្រះរាជអាជ្ញា ហើយរដ្ឋ Salzburg មិនទាន់បានធ្វើសេចក្តីថ្លែងការណ៍ណាមួយទេរហូតមកដល់ពេលនេះ។
មេធាវីការពារក្តីលោក Michael Hofer បានបញ្ជាក់បន្ថែមលើព័ត៌មាននេះថា “តុលាការបានផ្តន្ទាទោសលើជនជាប់ចោទរបស់ខ្ញុំឲ្យជាប់ពន្ធនាគាររយៈពេល៣ឆ្នាំដោយធ្វើការឃុំឃាំង
បណ្តោះអាសន្នរយៈពេល១៨ខែ ហើយគាត់អាចនឹងត្រូវបានដោះលែងដោយសារតែមានលក្ខខណ្ឌដោះលែង”។
គួររំលឹកផងដែរថា បុរសជនជាតិអូទ្រីសលោក Martin M មានអាយុ ៧១ឆ្នាំម្នាក់អាចត្រូវប្រឈមមុខនឹងការជាប់ពន្ធនាគាររយៈពេល ១០ឆ្នាំ។
ព្រះរាជអាជ្ញា Salzburg បានចោទប្រកាន់គាត់ពីការចែកចាយអាថ៌កំបាំងរបស់រដ្ឋ និងចែកចាយអាថ៌កំបាំងផ្នែកយោធាដោយចេតនាដើម្បីធ្វើឱ្យអន្តរាយដល់ប្រទេសអូទ្រីស និងដើម្បីផលប្រយោជន៍ប្រទេសរុស្ស៊ី។
យោងទៅតាមការចោទប្រកាន់ជនសង្ស័យបានធ្វើការឱ្យអង្គភាព GRU របស់រុស្ស៊ី (អគ្គនាយករងបុគ្គលិកទូទៅនៃកងកម្លាំងប្រដាប់អាវុធនៃសហព័ន្ធរុស្ស៊ី)អស់រយៈពេល២៥ឆ្នាំ ចាប់តាំងពីឆ្នាំ ១៩៩៣ ដោយលោកបានផ្តល់ព័ត៌មានអំពីកងកម្លាំងប្រដាប់អាវុធ ប្រព័ន្ធអាវុធរបស់ប្រទេសអូទ្រីស គោលបំណងនៃកម្លាំងមូលដ្ឋាន និងទ័ពអាកាស។
យោងតាមប្រភពពីអ្នកស៊ើបអង្កេតការណ៍បានឱ្យដឹងថា បុរសនោះបានទទួលប្រាក់ជិត៣០ម៉ឺនអឺរ៉ូជាការទូទាត់។
ជនសង្ស័យបានបដិសេធរាល់ការចោទប្រកាន់ទាំងអស់។ មេធាវីរបស់គាត់បាននិយាយថាបុរសអាយុ៧១ឆ្នាំរូបនេះមិនបានបំបែកអាថ៌កំបាំងរបស់រដ្ឋទេ ហើយគាត់បានប្រមូលតែព័ត៌មានមកពីប្រភពបើកចំហរមានដូចជាពីវ៉ិបសាយ និងកាសែតប៉ុណ្ណោះ៕
