អ្នកនាំពាក្យក្រសួងការបរទេសចិនបាននិយាយនៅថ្ងៃព្រហស្បតិ៍ថា ប្រទេសចិនបានធ្វើការជំទាស់ជាដាច់ខាត និងថ្កោលទោសយ៉ាងខ្លាំងចំពោះការហោះហើររបស់យន្តហោះយោធាសហរដ្ឋអាមេរិក C-40 A Clipper ដែលបានហើរឆ្លងកាត់លើទឹកដីកោះតៃវ៉ាន់នៅដើមសប្តាហ៍នេះ។
ប្រទេសចិនថែមទាំងអះអាងថា នឹងចាត់វិធានការចាំបាច់ទាំងអស់ដើម្បីការពារអធិបតេយ្យភាពសន្តិសុខ និងផលប្រយោជន៍អភិវឌ្ឍន៍របស់ប្រទេសខ្លួន។
អ្នកនាំពាក្យលោកស្រី Hua Chunying បានធ្វើការកត់សម្គាល់នៅក្នុងសន្និសីទកាសែតមួយនៅពេលត្រូវបានគេស្នើឱ្យធ្វើអត្ថាធិប្បាយលើរបាយការណ៍ដែលថា យន្តហោះយោធាសហរដ្ឋអាមេរិក C-40A Clipper បានហោះហើរលើកោះតៃវ៉ាន់នៅថ្ងៃអង្គារ។ លោកស្រីមានប្រសាសន៍ថា
“សកម្មភាពរបស់ភាគីសហរដ្ឋអាមេរិកបានរំលោភបំពានយ៉ាងធ្ងន់ធ្ងរទៅលើច្បាប់អន្តរជាតិ និងបទដ្ឋានជាមូលដ្ឋានក្នុងការដឹកនាំទំនាក់ទំនងអន្តរជាតិ ហើយប្រទេសចិនសូមប្រឆាំងដាច់ខាត និងថ្កោលទោសយ៉ាងខ្លាំងចំពោះសកម្មភាពរបស់សហរដ្ឋអាមេរិក។ យើងជំរុញឱ្យសហរដ្ឋអាមេរិកគោរពតាមគោលការណ៍របស់ប្រទេសចិនតែមួយ (one-China principle) និងលក្ខន្តិកៈនៃសេចក្តីថ្លែងការណ៍រួមរវាងប្រទេសចិន និងសហរដ្ឋអាមេរិកទាំងបី ហើយបញ្ឈប់ជាបន្ទាន់នូវសកម្មភាពខុសច្បាប់ និងការបង្កហេតុនានា។ប្រទេសចិននឹងចាត់វិធានការចាំបាច់ទាំងអស់ដើម្បីការពារអធិបតេយ្យភាពសន្តិសុខ និងផលប្រយោជន៍អភិវឌ្ឍន៍របស់ខ្លួន” ។
គួររំលឹកផងដែរថា យោងតាមការចុះផ្សាយរបស់ប្រព័ន្ធផ្សព្វផ្សាយ globaltimes បានឱ្យដឹងថា យន្តហោះដឹកជញ្ជូនយោធាអាមេរិក C-40 A Clipper មួយគ្រឿងបានហោះហើយលើឆ្នេរសមុទ្រភាគខាងលិចនៃកោះតៃវ៉ាន់នៅព្រឹកថ្ងៃអង្គារ ទី០៩ ខែមិថុនា នៅដើមប្តាហ៍នេះ ។ បន្ថែមពីលើនេះផងដែរ នៅព្រឹកថ្ងៃអង្គារ៍ដដែល មានយន្ដហោះចម្បាំង Sukhoi Su-30 ជាច្រើនគ្រឿងបានហោះចូលនៅឯភាគនិរតីនៃដែនអាកាសវ៉ាន់ក្នុងតំបន់ច្រកសមុទ្រតៃវ៉ាន់ ដែលបណ្តាលឱ្យកម្លាំងអាកាសតៃវ៉ាន់ ទទួលបានការបញ្ជាឱ្យហោះចេញទៅរារាំងយន្តចម្បាំងទាំងនោះជាបន្ទាន់៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី១១ ខែមិថុនា ឆ្នាំ២០២០
