យន្តហោះចម្បាំងមកពីប្រទេសតួកគីបានធ្វើការវាយប្រហារតាមអាកាសកាត់ព្រំដែននៅថ្ងៃចន្ទ កំណត់គោលដៅលើក្រុមឧទ្ទាមឃឺដតួកគីនៅភាគខាងជើងប្រទេសអ៊ីរ៉ាក់។ ក្រសួងការពារជាតិតួកគីបានសរសេរលើបណ្តាញសង្គមធ្វីតធ័រថា៖
“នៅក្នុងប្រតិបត្ដិការចុងក្រោយ Claw-Eagle បានវាយប្រហារលើគោលដៅដែលសង្ស័យថា ជារបស់គណបក្សពលករឃឺដ (PKK) ខុសច្បាប់នៅតាមតំបន់ជាច្រើននៅភាគខាងជើងប្រទេសអ៊ីរ៉ាក់រួមទាំងតំបន់ Sinjar។
យោធាបានអះអាងថា គោលដៅ PKK ចំនួន ៨១កន្លែងរងការវាយប្រហាររាប់បញ្ចូលទាំងនៅតំបន់តាំងលំនៅ និងរូងភ្នំ ដោយប្រភពបន្ថែមថា យន្ដហោះនោះវាយប្រហារយកចិត្តទុកដាក់ខ្ពស់បំផុតមិនបង្កឱ្យមានគ្រោះថ្នាក់ដល់ជនស៊ីវិល។
ពុំមានសេចក្តីថ្លែងការណ៍បន្ទាន់ណាមួយពីក្រុម PKK ដែលជាក្រុមមួយបានធ្វើសង្គ្រាមកុបកម្មរយៈពេលច្រើនជាងបីទសវត្សរ៍មកហើយនៅភាគអាគ្នេយ៍ប្រទេសតួកគី។ ក្រុងអង់ការ៉ាតែងតែធ្វើការវាយប្រហារតាមអាកាសប្រឆាំងនឹងក្រុម PKK ដែលតាំងមូលដ្ឋាននៅភាគខាងជើងប្រទេសអ៊ីរ៉ាក់។
នៅក្នុងហេតុការណ៍ដាច់ដោយឡែកមួយទៀត នៅថ្ងៃចន្ទប៉ូលិសតួកគីបានបាញ់ឧស្ម័នបង្ហូរទឹកភ្នែក និងគ្រាប់ផ្លាស្ទិកទៅលើក្រុមបាតុករដែលគាំទ្រដល់ក្រុមឃឺដ។ គេរាយការណ៍ថា មានមនុស្សចំនួនរាប់សិបនាក់បានប្រមូលផ្តុំគ្នានៅទីក្រុងSilivri ដែលស្ថិតនៅភាគពា យ័ព្យប្រទេសតួកគី ក្រោយពីសភាបានរារាំងសមាជិកសភាមកពីគណបក្សសាធារណរដ្ឋ (CHP) រួមជាមួយនឹងមនុស្សចំនួនពីរនាក់មកពីគណបក្សប្រជាធិបតេយ្យប្រជាជនឃឺដ។
ប្រែសម្រួល៖ ប៉ោក លក្ខិណា
ប្រភពព័ត៌មាន RT ផ្សាយថ្ងៃ១៥ ខែមិថុនា ឆ្នាំ២០២០
