យន្តហោះចម្បាំងដែលគេស្គាល់ថា ជាយន្តហោះ F-15C Eagle បានធ្លាក់នៅព្រឹកថ្ងៃច័ន្ទ។ យន្ដហោះនោះត្រូវបានគេប្រគល់ទៅឱ្យក្រុម Fighter Wing ទី៤៨ ដែលមានមូលដ្ឋាននៅ ភូមិ RAF Lakenheath នៅក្នុងទីក្រុង Suffolk ប្រទេសអង់គ្លេស។
អ្នកបើកយន្តហោះទ័ពអាកាសសហរដ្ឋអាមេរិកម្នាក់ត្រូវបានគេរកឃើញថាស្លាប់ ក្រោយពីយន្តហោះនោះធ្លាក់ចូលក្នុងសមុទ្រភាគខាងជើងនៅអំឡុងពេលធ្វើបេសកកម្មបណ្តុះបណ្តាល។ បំណែករបស់យន្ដហោះត្រូវបានសេវាកម្មឆ្មាំសមុទ្ររបស់ចក្រភពអង់គ្លេសរកឃើញនៅរយៈពេលប៉ុន្មានម៉ោងក្រោយមកទៀត។
យោងតាមសេចក្តីថ្លែងការណ៍មួយចេញផ្សាយដោយកងទ័ពអាកាសបានអោយដឹងថា គេមិនទាន់ដឹងពីមូលហេតុដែលបង្កឱ្យមានគ្រោះថ្នាក់នេះនៅឡើយទេ។ ក្រុមអ្នករុករក និងក្រុមជួយសង្គ្រោះអង់គ្លេសដែលដាក់ពង្រាយនៅកន្លែងកើតហេតុបានប្រទះឃើញបំណែករបស់យន្តហោះមុនពេលរកឃើញសាកសពរបស់អ្នកបើកយន្តហោះ។
សេចក្តីថ្លែងការណ៍មួយដែលបញ្ជាក់ពីការស្លាប់ក្នុងភូមិ RAF Lakenheath មានសេចក្តីថា “យើងសូមចូលរួមរំលែកមរណទុក្ខដ៏ក្រៀមក្រំបំផុតចំពោះក្រុមគ្រួសាររបស់អ្នកបើកយន្តហោះ និងកងវរសេនាតូចចម្បាំងលេខ ៤៩” ពួកគេបាននិយាយថា ឈ្មោះសពនឹងមិនត្រូវបានបញ្ចេញទេ រហូតដល់ក្រុមគ្រួសាររបស់សពទទួលបានដំណឹង។
ប្រែសម្រួល៖ប៉ោកលក្ខិណា
ប្រភពព័ត៌មាន RT ផ្សាយថ្ងៃទី១៥ ខែមិថុនា ឆ្នាំ២០២០
