កងកម្លាំងសន្តិសុខឃឺដបានប្រកាសនៅថ្ងៃអាទិត្យនេះថា បានចាប់ខ្លួនស្ត្រីរដ្ឋអ៊ីស្លាមIS ចំនួន៣នាក់ស្ថិតនៅក្នុងតំបន់Ain Issa ដែលពួកគេបានរត់គេចចេញពីជំរំal-Hol ក្នុងប៉ុន្មានថ្ងៃថ្មីៗនេះ។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយបានអោយដឹងថាស្ត្រីទាំង៣នាក់នេះបានជិះរថយន្តដែលបើកបរពីភូមិal-Dibsi ស្ថិតនៅភាគខាងលិចតំបន់ Ain Issa ឆ្ពោះទៅកាន់តំបន់ Gire Sipi ដែលជាកន្លែងដែលកងទ័ពតួកគី និងក្រុមឧទ្ទាមអ៊ីស្លាមនិយមទទួលខុសត្រូវ។
ស្ត្រីទាំងនោះត្រូវបានគេស្គាល់ថាឈ្មោះMaryam Mohammed អាយុ៦៤ឆ្នាំ Reem Ibrahim អាយុ២៩ឆ្នាំ និងHibaSalih អាយុ២៥ឆ្នាំ។
គួរបញ្ជាក់ថាជំ រំal-Hol ស្ថិតនៅក្នុងខេត្ត Hasakah នៃប្រទេសស៊ីរីដែលជាកន្លែងដែលមានសមាជិករដ្ឋអ៊ីស្លាមជាង៧២,០០០នាក់ និងក្រុមគ្រួសាររបស់ពួកគេត្រូវបានឃុំខ្លួន។ កងកម្លាំងប្រជាធិបតេយ្យស៊ីរីដឹកនាំដោយសហរដ្ឋអាមេរិកជាអ្នកទទួលខុសត្រូវចំពោះការការពារជំរំនេះ។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ១៥ ខែមិថុនា ឆ្នាំ២០២0
